DILI, 13 novembru 2024 (TATOLI)–Prezidente Autoridade Munisipál Ataúro, Mateus Belo, relata ezekusaun Orsamentu Jerál Estadu (OJE) 2024 atinje ona 77% husi total orsamentu $2.102.571,00.
“To’o até a data, ami-nia taxa ezekusaun ba OJE 2024 bele to’o ona 77%. Ami hakat liu ona munisipiu sira seluk ne’ebé importante,” Prezidente Autoridade Munisipál Ataúru, Mateus Belo, informa ba jornalista sira iha serimonia pose ba kargu xefia sira iha salaun INAP, Comoro.
Nia esplika, ezekusaun OJE ne’e ba area prioridade sira hanesan infraestrutura hodi halo konstrusaun refeitóriu ba estudante sira iha eskola, uma ba profesór sira, bee-moos, saúde no sosiál.
“Ida-ne’e mak área xave sira, iha área saúde no edukasaun ne’ebé ita foka merenda eskolár hanesan atividade pre-eskolár no ensinu eskolár,” nia dehan.
Iha proposta OJE 2025 ba Autoridade Administrativa Ataúro ho totál hamutuk $2.550.389 hodi implementa programa prioridade sira hanesan infraestrutura bázika, asuntu edukasaun no sosiál.
Iha fatin hanesan, Sekretariu Estadu Dezenvolvimentu Lokal (SEDL), Mateus dos Santos Tallo, agradese ba Autoridade Munisipál Ataúro atu bele ezekuta di’ak-liu tan to’o 95% iha dezembru.
“Estrutura (Autoridade Munisipál) Ataúro agora kompletu, pelumenus to’o fim do anu ne’e ezekusaun atinje ona 95%,” nia hateten.
Jornalista : Jesuína Xavier
Editór : Cancio Ximenes
