COVALIMA, 13 Novembru 2024 (TATOLI) – Komandante Jerál Polísia Nasionál Timor-Leste (PNTL), Komisáriu Henrique da Costa, inaugura kampu multifunsaun ho naran mahein Santu António, iha munisípiu Covalima. Kriasaun kampu ne’e ho intensaun atu redús krime.
“Kampu multifunsaun bele uza voleiból, fustál no seluk tan. Nia benefísiu ba ita hodi dezenvolve desportu iha futuru. Ita dezenvolve fatin ida ne’e bele utiliza, nune’e ita-nia joven no komunidade bele redús krime, nune’e kontinua halo atividade negósiu ho di’ak no situasaun seguransa kontrolada”, Henrique da Costa dehan iha inaugurasaun ne’e.
Komisáriu ne’e salienta katak porsesu konstrusaun kampu multifunsaun, komandu PNTL la fó kontribuisan, maibé nia promete atu pinta kampu ne’e ba responsabilidade PNTL nian.
“Kampu nia medida preinxe ona rekizitu, maibé presiza atu hadi’a tan, tanba fui simentu seidauk prienxe rekizitu, tanba ema monu bele kanek. Ida ne’e la’oó sai standar di’ak liu, maibé minimiza jogadór sira monu no labele hetan kanek”, nia dehan.
Komandante PNTL Covalima, Superintendente Polísia Calisto Gonzaga, hateten kampu munltifunsaun ne’e foin atinje 99%, maibé halo ona inaugurasaun.
“Ita halo ona inaugurasaun ho intesaun atu ita hametin relasaun desportivu PNTL ho komunidade no joven-sira. Kampu multifunsaun bele uza ho di’ak ho intensaun atu halo prevensaun ba konflitu sosiál. Hafoin hala’o inagurasaun, Komandu PNTL hahú rejistu ona klubu ba PNTL Cup”, nia informa.
Kampu multi funsaun ho nia medida 50×30, maibé ba futeból salaun 45×23 tuir medida internasionál ne’ebé kompleta ho sintina ba feto no mane.
Konstrusaun kampu ne’e halo tanba Komadante simu orientasuan husi Komandante Jerál no fatin ne’e sei la uza de’it ba atividade desportiva, maibé uza ba halo formatura parada no seluk tan.
“Bele uza ba desportu no halo teste bainhira halo rekrutamentu ba PNTL no bele aluga hodi halo festa”.
PNTL Covalima konstrui kampu ne’e tanba hetan apoiu materiál husi empreza lokál hanesan Joni Z, Aitula, Star King no Victoria.
Jornalista: Celestina Teles
Editora: Maria Auxiliadora
