Populasaun besik 1000 iha Ataúro seidauk asesu liña eletrisidade
DILI, 13 Novembru 2024 (TATOLI)–Prezidente Autoridade Munisipal Ataúro, Mateus Belo, hateten besik 1000 iha aldeia haat iha munisipiu Ataúro seidauk asesu ba liña eletrisidade.
“Populasaun seidauk bele hetan hotu asesu ba iha liña eletrisidade tanba kustu ba forneseimentu kombustível aas,” Prezidente Autoridade Munisipal Ataúru, Mateus Belo, relata ba jornalista sira, iha INAP, Comoro.
Tuir nia, servisu Eletrisidade de Timor-Leste mós seidauk fornese atu liña eletrisidade atu lakan durante oras 24 nia laran.
“Enerjia eletrisidade ita seidauk fornese 24 oras, ita fahe oras, foin mak lakan to’o tuku 12h00 kalan,” nia dehan.
Totál populasaun husi aldeia haat hamutuk besik 1000 ne’ebé seidauk asesu ba iha liña eletrisidade iha Ataúro.
Entre populasaun sira-ne’e, nia dehna, iha iha populasaun ne’ebé kontinua konsume udan-been, tanba rekursu bee menus.
“Komunidade iha foho leten por volta rihun rua mak konserva no uza udan-been,” nia dehan.
Tanba ne’e, nia parte halo hela esforsu oinsá halo aproveitamentu ba bee kdadalak atu halo perfurasaun ba bee.
Jornalista : Jesuína Xavier
Editór : Cancio Ximenes
