FDCH planeia bolseiru na’in-haat ba foti espesialista matan iha Indonézia

DILI, 14 novembru 2024 (TATOLI)–Governu liuhusi Fundu Dezenvolvimentu Kapitál Umanu (FDCH, sigla portugés) planeia haruka bolseiru timoroan na’in-haat ba estudu espesialista matan iha Indonézia tanba daudaun ne’e espesialista iha área ne’e menus tebes.

“Bainhira ami ko’alia ba malu, buat ida-ne’ebé dada ha’u-nia atensaun mak estudu espesialidade ba matan nian, entaun ita planeia haruka ema na’in-tolu ka haat ba foti espesialidade matan nia, tanba iha Timor espesialista ba área matan seidauk barak. Tanba ne’e tinan oin ita tenke haruka sira bá,” Diretór Ezekutivu FDCH, Júlio Aparício, informa iha ninia knaar fatin, Colmera, kinta ne’e.

Notísia relevante : FDCH tinan oin prioriza bolsa estudu ba espesialista iha área oin-oin

FDCH haruka timoroan sira foti área teknolojia atu kapasita liután rekursu umanu ba área ne’e.

“Ita haruka sira bá para kapasita liután sira-nia koñesimentu iha área referdu, nune’e bainhira fila nia kontribui ba nasaun ida-ne’e. Timor-Leste ne’e presiza dezenvolvimentu tanba ne’e ita tenke prepara rekursu umanu, nune’e bele dezenvolve di’ak liután ita-nia Estadu no nasaun ida-ne’e,” nia akresenta.

FDCH estabelese kooperasaun ho Universitas Megarezky (UniMerz) iha makasar-Indonézia hodi haruka timoroan sira atu bá estuda iha área saúde no teknolojia.

Nune’e, parte rua asina akordu tékniku ona maibé tinan oin foin haruka timoroan sira bá hala’o estudu iha ne’ebá ho Orsamentu Jerál Estadu (OJE) 2025.

“Ita asina akordu téknikamente maibé planu ne’e tinan 2025 mak ita foin hahú haruka timoroan sira bá estuda iha ne’ebá. Tinan oin mak haruka bá tanba agora ne’e fim do ano ona, ne’ebé ita tenke utiliza fali orsamentu foun foin rekruta ema tuir bolsa méritu,” nia tenik.

Jornalista     : Osória Marques

Editora         : Julia Chatarina