COVALIMA, 25 Novembru 2024 (TATOLI) – Servisu Munisipál Agrikultura (SMA) Covalima distribui ona fini batar noi-mutin tonelada ualu ba autoridade sira iha postu administrativu hitu hodi fahe ba to’os-na’in sira atu kuda.
“Ita distribui ona fini batar noi-mutin ba autoridade postu administrativu Fatululik, Fatumea, Fohorem, Tilomar, Suai no Zumalai, hafoin xefe suku-sira mak distribui ba to’os-na’in sira, nune’e tempu udan sira bele kuda”, Diretór SMA Covalima, Lino Magno, dehan iha Tabakolot, ohin.
Dirijente ne’e esplika katak Agrikultura fahe fini batar ne’e haree ba kada suku no balun la to’o tonelada ida.
Xefe Departamentu Programa Estensaun Agríkola Covalima, Filomeno Saldanha, konfirma katak Agrikultura Covalima distribui fini batar ba postu admistrativu sira hahú iha loron ikus Outubru nian, maibe daudaun seidauk iha dadus to’os-na’in hira mak simu ona fini batar.
“Fini batar ne’e ami distribui ba xefe suku sira hafoin sira mak distribui ba to’os-na’in sira liuhusi priense formatu ne’ebé ami prepara, nune’e ita bele hatene kada toos-na’in sira simu kilógrama hira”, nia adianta.
Fini batar ba Covalima hamutuk tonelada ualu ne’ebé distribui ba postu administrativu Fatumea hamutuk kilógrama (kg) 750, Fatululik 500kg, Tilomar 1000kg, Maucatar 1000kg, Fohorem 1000kg, Zumalai 1.120kg no ba postu Suai hamutuk 2.630kg
Jornalista: Celestina Teles
Editora: Maria Auxiliadora
