DILI, 03 dezembru 2024 (TATOLI)–Reprezentante Banku Nasionál Komersiu Timor-Leste (BNCTL), Jeanetty H. Alves Fernandes, informa BNCTL fó ona kréditu ba feto rurál sira hamutuk ema besik 100 hodi halo negósiu liuhusi Kréditu fiar.
“Bazeia ba iha dadus BNCTL nian iha outubru besik ema 100 ba kréditu ne’ebé ami finansia ona ho naran produtu fiar ho valór ekivalente besik rihun $300 ne’ebé ami distribui ona ba iha área rurál,” Nia hato’o iha nia diskursu iha semináriu no bazar ne’ebé organiza husi FOKUPERS ho tema “Hamutuk ita Prevene no hapara Violénsia hasoru feto liuhusi asegura feto nia direitu fundamentál sira inklui direitu ba rai no Propriedade,” nia hateten iha nia diskursu, iha Faról. Tersa ne’e.
Liuhusi kooperasaun entre BNCTL ho Ministériu Komérsiu no Indústria ho programa Kréditu Suave, BNCTL mós fó Kréditu ba ema hotu iha vida negósiu.
“Kreditu suave ne’e ita fó ba feto ho men hotu, maibé iha maioria ne’e feto mak aplika ba iha Kréditu ida-ne’e ita reajusta ona ema liu 40,” nia dehan.
Iha programa Kréditu Suave balun má-paradu, maibé BCTL iha ona dalan atu resolve, iha barreira ida kona-ba kréditu ne’e mak garantia adisionál.
Banku mós servisu hamutuk ho Governu no Organizasaun Naun Governamentál balun atu kria sistema garantia ida atu bele fó kreditu ba feto maluk sira seluk.
Reprezentante ne’e hateten, dalan atu asesu ba Kréditu fiar no suave mak liuhusi plataforma BNCTL ka hakat diretamente ba iha BNCTL.
Prezidente Konsellu Kuradór FOKUPERS, Maria Domingas Fernandas Alves “Micato”, hateten kona-ba justisa di’ak ba feto maluk sira iha Timor-Leste, hakarak mós promove feto iha vida ekonomia família nian.
“Kreditu BNCTL atu hasa’e kbiit sobrevivente sira-nia vida ekonomia,” nia hateten.
Iha feto balun mak hetan hetan ona prémiu rekoñesimentu ba iha vida negósiu atu hadi’a ekonomia.
Jornalista : Jesuína Xavier
Editór : Cancio Ximenes
