DILI, 06 dezembru 2024 (TATOLI)–Xefe Departamentu Servisu Saneamentu iha Autoridade Munisipal Dili (AMD), Domingos Soariano dos Santos, hateten AMD aumenta tan karreta modernu rua hodi reforsa rekolla lixu iha kapitál Dili.
Nia relata, antes ne’e kareeta modernu rekolla lixu hamutuk hitu (7) mak halo ona operasaun ne’ebé jere husi empreza PAX hodi rekolla lixu sira-ne’ebé populasaun sira so’e iha lixeira sira ka kaixote lixu ne’ebé koloka iha kada bairru kai ha fatin public sira iha kapitál Dili.
“Agora, ami aumenta tan rua (2) no hamutuk sia (9) mak halo hela operasaun rekolla lixu iha kapitál. Karreta rua (2) ne’e hahú tan rekolla lixu iha fulan-outubru 2024 nia rohan ne’e,” Domingos Soariano dos Santos hateten ba Agência TATOLI, iha Matadoru, sesta ne’e.
Tuir nia, karreta modernu ba rekolla lixu ne’e kompostu husi karreta boot neen (6) no kiik ka natoon tolu (3) ne’ebé mak halo hela operasaun rekolla lixu.
Xefe departamentu ne’e dehan, kaereta kompaktór rua ne’ebé halo hela operasaun ne’e atu reforsa di’ak liu-tan servisu rekolla lixu iha Dili laran.
Nia konsidera maske aumenta tan karreta modernu rekolla lixu rua ne’e, seidauk bele responde rekolla lixu sira iha kapitál tanba montante lixu ne’e boot tebes.
“Kaereta sira-ne’e seidauk bele kobre fatin lixu sira-ne’ebé tau iha estrada sira. Distribuisaun kaixote lixu ne’e barak no transporte lixu ba Tibar ne’e menus. Tuir ami-nia observasaun ne’e seidauk bele kobre lixu sira hotu,” nia dehan.
Iha karreta modernu hamutuk 20 ne’ebé AMD iha, maibé sei iha prosesu preparasaun operatór ba ekipamentu sira-ne’e atu bele lori ka kondús hodi foti lixu.
“Preparasaun ba motorista sira-ne’e la’o hela maibé laliu iha formasaun ka teste ne’ebé husi empreza tanba ne’e prosesu hela,” nia hateten.
Jornalista : Jesuína Xavier
Editór : Cancio Ximenes
