DILI, 06 dezembru 2024 (TATOLI)–Xefe Departamentu Servisu Saneamentu iha Autoridade Munisipál Dili (AMD), Domingos Soariano dos Santos, hateten AMD halo ona prosesu akizisaun atu sosa ai-funan “Pucuk Merah” hodi bele troka ka kuda fali iha área Delta sa’e ba Elemloi.
“Ami buka hela ai-funan ida atu troka iha dezembru nia laran. Ami sei book hela palásiu prezidente nian ba Comoro. Ami halo akizisaun ai-funan 200-resin atu troka iha Elemloi nian,” Domingos Soariano dos Santos hateten ba Agência TATOLI, iha Matadoru, sesta ne’e.
Nia esplika, ai-funan ne’ebé AMD halo prosesu akizisaun no hakarak kuda iha área sira-ne’e mak ai-funan surat-tahan.
“Ai-funan sira-ne’e atu troka ai-funan iha área palásiu prezidensiál to’o Comoro nian ne’ebé balun mate no restante ne’e sei troka ai-funan sira-ne’ebé iha área Delta nian sa’e ba Elemloi,” nia dehan.
Xefe departamentu ne’e hateten, AMD iha planu oinsa atu haree ai-funan “Pucuk Merah” atu kuda iha área sira, maske iha proposta aprovasaun ba akizisaun temi ai-funan surat-tahan.
“Ami seidauk halo identifikasaun ai-funan sira-ne’ebé mate iha área Delta nian to’o Elemloi no balun hosi Hudi Laran to’o Elemloi nia mos mate,” nia hateten.
Tanba ne’e, nia dehan, AMD haree mos ai-funan “Pucuk Merah” atu bele kuda iha fatin sira ne’e.
Jornalista : Jesuína Xavier
Editór : Cancio Ximenes
