DILI, 09 dezembru 2024 (TATOLI)- Momentu Reflesaun Estratéjiku ba dezenvolvimentu programa Fundu Nasaun Unida ba Labarik (UNICEF, sigla inglés) iha Timor-Leste ba tinan lima mai (2026-2030), atu reforsa kapasitasaun ba dezenvolvimentu labarik no inan isin rua iha Timor-Leste (TL).
“Ohin ne’e hetan konvite mai iha Momentu Reflesaun ho Estratéjiku ne’e kona-ba Dezenvolvimentu UNICEF iha Timor-Leste ba tinan lima mai. Portantu reflete ba tinan lima mai ne’e hodi ko’alia kona-ba sira-nia planu estratéjiku ho Governu Timor-Leste, reforsa Institusionál ne’e, kapasitasaun konstitusionál ba atendementu orientadu labarik sira ba nutrisaun, ba saúde no saúde maternál nian liuliu mós kona-ba edukasaun ne’e,” Ministru Negósiu Estranjeiru no Kooperasaun (MNEK), Benedito Freitas, hatete, iha salaun MNEK, Prai dos Coqueiros, Dili, segunda ne’e.
Tanba ne’e ohin prezensa mós husi Ministériu Edukasaun, Institutu Nasionál Defeza Direitu ba Labarik (INDDICA) no Ministériu relevante seluk. Nune’e iha solusaun ba planu programa estratéjiku entre Governu ho UNICEF.
“Ida-ne’e importante hodi futuru ita-nia joven sira mós bele hetan benéfisiu husi parseiru estratéjiku entre Governu Timor-Leste ho Ajénsia Nasaun Unida, prinsipalmente UNICEF ne’ebé servisu hamutuk durante ne’e iha Timor-Leste ba sira-nia dedikasaun kontrubutu ba ita-nia dezenvolvimentu ba labarik no inan isin rua sira ne’ebé presiza,” MNEK dehan.
Alende ne’e kona-ba definisaun reflesaun sira kona-ba planu estratéjiku tinan lima ne’e atu responde ba objetivu Dezenvolvementu milenium ne’e. Ida-ne’e importante tebes tanba sustentanbilidade, inkluzividade ne’ebé benéfisia ba povu Timor-Leste.
“Ita-nia esperansa mak parseria estratéjiku entre Governu Timor-Leste UNICEF bele fortifika liután no parseira ne’ebé mais estreita, mais próxima, atu haree ba oin ne’e oinsá. Kooperasaun ne’ebé mais prinsípiu. Enkontru loron ohin nian ne’e ita sei servisu barak no espera katak enkontru ida-ne’e bele hetan solusaun ruma atu nune’e UNICEF bele halo servisu iha tinan lima ba oin, hamutuk ho nia parseiru sira iha Timor-Leste,” governante ne’e dehan.
Reprezentante UNICEF, Patrizia DiGiovanni espera katak liuhusi Momentu Reflesaun Estratéjiku ba tinan lima mai bele hetan solusaun nune’e labarik no inan isin rua bele hetan benéfisiu.
“Espera katak iha tinan lima mai husi 2026-2030, labarik hotu-hotu iha Timor-Leste bele reduz má nutrisaun, no labarik sira hotu bele ba eskola inklui bele asesu ba bee-moos, saneamentu no seluktan. Ami hakarak labarik hotu-hotu hetan protesaun husi violénsia iha Timor-Leste,” Patrizia hatete.
Ko’alia kona-ba má nutrisaun, UNICEF servisu hamutuk ho Governu buka meiu ida hodi reduz ra’es-badak ne’ebé agora daudaun iha Timor-Leste 47%.
Jornalista: Osória Marques
Editór: Rafael Ximenes de A. Belo
