DILI, 11 dezembru 2024 (TATOLI) – Autoridade Aduaneira (AA) ka Alfandega Timor-Leste no Asosiasaun despaixante aduaneira (ASDATIL) lansa kodigu étika despaxante atu hadi’a serbisu forma transparánsia no profisionál iha sira-nia serbisu ba atendimentu kliente sira.
Komisáriu Autoridade Aduaneira, Joanico Pereira, hateten ASDATIL reprezenta despaxante aduaneira lisensiadu iha Timor-Leste hodi promove prátika di’ak, profisionalizmu no kumpre ba regulamentu sira komérsiu nian ba operasaun Alfandega ne’ebé efisiente.
Asosiasaun despaxante aduaneiru hala’o kna’ar prinsipál ida hodi asegura konformidade, efikasia no transparánsia iha komérsiu internasionál, hodi bele hala’o kna’ar sira-nia obrigasaun tuir kodigu Alfandega no kumpre padraun étika nian, tanba ne’e ASDATIL hetan apoiu husi Ajénsia Nasaun Unida ba Dezenvolvimentu Internasionál (USAID) hodi dezenvolve kódigu ida-ne’e.
“Kódigu étika ida-ne’e fornese matadalan ne’ebé klaru ba membru ASDATIL sira atu mantein integridade, profisioalizmu, prátika justu, rezolve kestaun sira hanesan korrupsaun, inefisiénsia no hahalok la étiku tuir regra hirak ne’e. Despaxante sira harii kredibilidade no promove konfiansa entre autór públiku no privadu sira iha komérsiu,” nia hateten liuhusi nia diskursu iha lansamentu kódigu ne’e rasik, iha Timor Plaza, kuarta ne’e.
Komisáriu ne’e dehan, kódigiu étika aliña ho lei nasionál no padraun internasionál ne’ebé fó sai husi Organizasaun Mundiál Alfandega ne’ebé hatudu prinsipál sira ba profisionalizmu, integridade iha setór despaxante sira-nian.
“Ha’u espera katak ho lansamentu ohin loron kona-ba kódigu étika ASDATIL nia sei serve nu’udár matadalan ida ba nia membru hotu, nomós ba komunidade komersiante sira kona-ba importánsia kódigu étika ida-ne’e ho ninia konformidade ba matadalan prinsipál sira hanesan fó sai iha artigu 43 kódigu Alfandega Dekretu-Lei nú.14/2017,” nia dehan.
Reprezentante ASDATIL, Hilário Barros, hateten ASDATIL hetan pasu ida ba lansamentu kódigu étika despaxante Aduaneira tuir padraun nasionál no internasionál.
“Ami orgullu hetan apouiu husi USAID no ita-nia Governu liuliu diresaun Alfandega fó apoiu máximu ne’ebé ohin loron hetan no halo lansamentu. Nu’udar asosisaun iha kompaña iha 23 ne’ebé iha lisensa ka rejistu iha Ministériu Justisa no hetan linsensiadu ba sertifikadu ba tratamentu dokumentus aduaneira,” nia relata.
Nia esplika, iha dokumentu aduaneira ne’e, sira sai matadalan ba prosedimentu importasaun no esportasaun liuliu ba dokumentu sira.
“Ohin loron, ami hetan tan oportunidade ida-ne’e atu bele aumenta di’ak liután. Ami-nia kapasidade ho membru sira hotu no fó koñesimentu kona-ba servisu despaxante. Antes ne’e despaxante sira hala’o servisu tuir estatutu lei artigu 43 nú 14/2017,” nia dehan.
Tuir nia, kódigu ne’e atu halo mudansa dixiplinár ba membru sira hotu liuliu despaxante sira 23 hotu iha asosiasaun laran atu promove, hadi’a no sai fasilita tuir kódigu étika ne’ebé iha no prosesu dokumentu sira atu liberta sasán sira tuir padraun nasionál no internasionál.
Kódigu étika ne’e rasik pontu importante hitu (7) iha ne’ebé hakerek kona-ba integridade, kompeténsia profisionál no koñesimentu.
Konfidensialidade no relasaun ho kliente, konformidade ba iha lei Alfandega, relasaun profisionál ho Autoridade Aduaneira, responsabilidade no rai dokumentu no kompromisu ba ASDATIL.
Jornalista : Jesuína Xavier
Editór : Cancio Ximenes
