DILI, 11 dezembru 2024 (TATOLI) – Governu liuhusi Reuniaun Konsellu Ministru (KM), kuarta ne’e, deside hodi kansela akordu finansiamentu ho International Development Association hosi Grupu Banku Mundiál.
Nota ne’ebé Ajénsia TATOLI asesu liuhusi Portal Governu katak projetu sira ne’ebé aprezenta husi Ministra Finansa, Konsellu Ministru delibera hodi autoriza Kanselamentu ba Akordu Finansiamentu ho International Development Association hosi Grupu Banku Mundiál ne’ebé iha relasaun ho: Projetu “Timor-Leste Basic Education Strengthening and Transformation”, loron 29 fulan-dezembru tinan 2020, ho montante millaun 10,9 Direitos de Saque Especiais (SDR, sigla iha lian inglés), ekivalente ho dolar amerikanu millaun 14,4 (Empréstimu n. 6551-TP).
Projetu “Timor-Leste Water Supply and Sanitation”, loron 29 fulan-dezembru tinan 2020, ho montante millaun 18,2 SDR, ekivalente ho dolar amerikanu millaun 24,1 (Empréstimu n. 6559-TP).
Projetu “Dili Water Supply”, loron 27 fulan-jullu tinan-2022, ho montante millaun 87,6 SDR (ekivalente ho dolar amerikanu millaun 116 (Empréstimu n. 7100-TP).
“Hafoin halo análize kle’an ida ba projetu sira ne’ebé finansia husi empréstimus, konklui katak projetu balu seidauk hahú ka iha taxa ezekusaun ne’ebé ki’ik tebes, Governu deside atu kansela ka reformula projetus balun, no esplora fontes finansiamentu sira seluk ba projetu sira seluk, nune’e Akordu Finansiamentu ne’ebé asina ona la presiza tan,” nota ne’e refere
Notísia relevante:KM aprova ona pagamentu estraordináriu saláriu adisionál ba administrasaun Públika
Jornalista: Osória Marques
Editór: Rafael Ximenes de A. Belo
