CI konklui projetu BIOPAMA ba konservasaun área protejida Kutulau
DILI, 12 dezembru (TATOLI)—Conservation International (CI) servisu hamutuk ho Ministériu Agrikultura Pekuária, Peska no Floresta (MAPPF) konklui projetu BIOPAMA (Biodiversity and Protected Areas Management) iha área protejida (AP) Kutulau-Liquiçá ne’ebé pretense ba suku lima hanesan Fatumasin, Fahilebu, Lorema, Motaulun no Ulmera.
Diretór Ezekutivu Conservation International (CI), Manuel Mendes, relata projetu ne’e hahú iha tinan kotuk ho apoiu finanseiru Uniaun Europeia ho objetivu atu sensibiliza konsiénsia populasaun no hasa’e kapasidade kona-ba konservasaun AP no ba sustentabilidade ekoturizmu no ortikultura.
“Projetu ne’e hahú iha tinan kotuk no termina iha tinan ne’e, durasaun fulan 18 no projetu ne’e hetan akompanamentu hosi funsionariu,” dirijente ne’e hato’o ba jornalista sira iha Timor Plaza.
Atividade iha Kutulau hanesan área protejida ho rai ektare rihun 4,9 ne’e komunidade kuda ai-oan, kuda modo no haki’ak animál hanesan bibi no manu husi grupu 15 ho membru 40.
Sekretariu Estadu Floresta, Fernandino Viera da Costa, hateten projetu ida-ne’e di’ak tebes atu ajuda komunidade iha Kutulau nian atu dezenvolve ekoturizmu no ortikultura.
“Ha’u apresia tebes CI ba projetu ne’e iha benefisiu ba populasaun iha futuru, maske hotu ona. Ita projetu real. La’ós númeru osan,” nia dehan.
Governante ne’e konsidera, projetu ne’e bele implementa iha área protejida sira seluk.
Xefe suku Fatumasin, Elizario Freitas, hateten projetu BIOPAMA di’ak ba komunidade iha suku lima.
“Ami hakarak koopera nafatin ho komunidade oinsá hanorin sira atu labele estraga ai-horis sira no animál protejida sira,” nia dehan.
Autoridade lokál ne’e dehan sei enkoraja nafatin mós populasaun atu kontinua hala’o projetu ne’e atu bele hetan rendimentu.
Jornalista : Jesuína Xavier
Editór : Cancio Ximenes
