DILI, 13 dezembru 2024 (TATOLI)—Prezidente Autoridade Rejiaun Espesiál Oécusse-Ambeno (RAEOA), Rogério Tiago Lobato, sesta ne’e, relata progresu serbisu ba Primeiru-Ministru (PM), Kay Rala Xanana Gusmão.
Serbisu ne’ebé ohin relata mak hanesan reabilitasaun estrada rurál sira iha zona Oé-cusse hanesan parte Oesilo bá Basabe, Nitibe Makasar no seluk tan hodi fasilita populasaun nia movimentasaun.
“Ohin informa ba Primeiru-Ministru katak agora ami halo esforsu maka’as atu hasai komunidade hosi izolamentu hanesan estrada a’at, tanba Primeiru-Ministru nia preokupasaun uluk kedas mak ne’e populasaun atu hetan apoia di’ak entaun estrada tenke di’ak tanba estrada rurál tinan 20 ona la halo manutensaun, maibé agora hahú aterru tanba tama iha projetu emerjénsia tanba atu halo estrada definitiva presiza osan boot, ne’ebé osan laiha,” Rogério Lobato hateten, iha Palásiu Governu.
Notísia relevante : PNDS hatuur fatuk dahuluk ba projetu reabilitasaun estrada rurál iha suku Usitasa’e
Nia dehan, estrada rurál sira iha Oé-cusse laran ne’ebé daudaun halo reabilitasaun loke luan no aterru ne’e besik kilómetru 90, ho kustu la liu millaun $5, liuhusi projétu emerjénsia.
Projetu estrada sira ne’e rasik la afeta ba komunidade tanba molok atu realiza projetu ne’e hetan kooperasaun di’ak tebes husi populasaun.
“Atividade ne’e la’o komunidade koopera tebes tanba sira mós hein tempu naruk ona atu hadi’a estrada ne’e, entaun projetu ne’e la’o komunidade na’in rasik sobu sira-nia lutu, maibé bainhira afeta ba ai-horis ruma autoridade prontu atu kompensa,” nia akresenta.
Jornalista : Arminda Fonseca
Editora : Julia Chatarina
