MJDAK prepara Dekretu-Lei estabelese Autoridade Nasionál ba Integridade Desportu

DILI,  17 dezembru 2024 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento, ne’ebé sai hanesan Prezidente Komisaun Nasionál Desportu (KND), dirije reuniaun plenária ho komisáriu desportu sira hodi diskute atu estabelse Dekretu-Lei  hodi kria Autoridade Nasionál ba Integridade Desportu (ANID), aprova estatutu ANID, no haree progresu servisu KND nian.

Durante reuniaun, Ministru Nelyo Isaac Sarmento hateten, importánsia ANID atu promové integridade, etika desportiva, no prevene manifestasaun anti-desportiva hanesan violénsia, korupsaun, doping, manipulasaun desportiva, no aposta ilegál.

“Husu ANID hodi akumula no implementa padraun internasionál sira, inklui prinsipiu WADA (World Anti-Doping Agency),” Ministru Nelyo hateten iha Salaun Magna MJDAK Lecidere, tersa ne’e.

Ministru Nelyo hatutan, nomeasaun komité etika ANID tenke hala’o ho transparénsia no independénsia, tuir kritéria rigorózu, no halo preferénsia ba profisionál sira ne’ebé iha integridade, kompeténsia, no kapasidade dezenvolve desportu iha Timor-Leste.

Iha okaziaun ne’e Sekretáriu Ezekutivu KND, Cesarino da Silva reforsa tan katak, progresu servisu KND iha triméstre ida-ne’e no subliña preparasaun ida atu implementa ANID.

“WADA atu fo asisténsia no rekomendasaun kona ba estatutu ANID hodi garante transparensia, inklui desizaun no nomeasaun independénte,” Cesarino tenik.

Cesarino dehan tan, “reuniaun ida-ne’e mós fó oportunidade atu apresia desizaun ida atu kumpri obrigasaun Timor-Leste nian kona ba regulamentu anti-doping mundiál, no mós valoriza lideransa KND iha dezenvolvimentu desportu, promosaun étika desportiva, no integridade iha rai laran”.

Jornalista: Hortencio Sanchez

Editór: Florencio Miranda Ximenes