DILI, 17 dezembru 2024 (TATOLI)-Reprezentante povu iha uma fukun Parlamentu Nasionál (PN), liuhusi Deputadu CNRT, Gabriel Soares, husu Governu liuhusi ministériu kompetente tau atensaun urjente kria morru protesaun ba natar iha Obratu-Manatuto.
“Ami fó hatene nafatin ba Governu, oinsá atu tau-matan no tenke atua urjente kona-ba protesaun morru barrajen ninian iha Obratu nian iha ponte Manatuto ne’e hateke sa’e ba leten, kuaze natar ektare besik-100 mak ita haree nia dudu tama daudaun ona ba vila laran ,’’ nia levanta liuhusi reuniaun plenária, tersa ne’e.
Reprezentante povu ne’e husu tau-matan tanba selae, bainhira tempu udan risku tebes, tanba akontesimentu 04 abríl iha 2021 Manatuto mós sai alvu bo’ot ba iha inundasaun.
Iha parte seluk, nia mós husu tau matan mós ba eskola EBF Harekai iha Suai, ne’e iha dalan públiku mota ne’e atu sobu tama ba estrada públiku ida ne’e estudante sira susar tebes. “Husu atu tau atensaun emerjénsia hodi ita-nia estudante sira iha eskola ne’eba,’’ nia hato’o
Deputada FRETILIN, Mariquita Soares, preokupa ho kondisaun ba infraestutura eskola Ailafa-Lautem ninian ne’ebé lokaliza iha suku Daudere, postu Lautem no mós menus manorin-na’in, nune’e husu ministériu kompetente tau atensaun.
Deputadu CNRT, José Virgílio, hato’o preokupasaun povu nian husi Aileu. “Iha parte Aileu entre suku Besi Lau, Koto Lau no Fatuk hun iha ne’eba eletrisidade riin halis rai-monu, ne’ebé rekomenda hela ba MOP hodi bele tun haree direita,’’nia dehan
Membru órgaun lejislativu ne’e dehan, iha suku Liurai nia-parte hala’o vizita eleitór iha ne’eba komunidade sira hato’o preokupasaun mota ida iha ne’ebá antes ne’e hala’o lansamentu husi empreza internasionál ida atu halo konstrusaun ponte maibé to’o agora seidauk hala’o konstrusaun, nune’e husu tau atensaun.
Deputada CNRT, Maria Gorumali Barreto, hato’o kestaun relevante la kle’ur tan ita tama ba selebrasaun Natal no tinan foun no ezijénsia mai husi sarani Maliana vila husu Governu atu normaliza estrada ida iha Maliana vila, liuliu tuun husi rotunda to’o iha Igreja parókia Maliana nian ne’ebé estrada sai hanesan mota nune’e husu atu normaliza.
Vise-Ministru ba asuntu Parlamentár, Adérito Hugo, rejista preokupasaun sira husi Deputadu sira-nian sei haruka ba ministériu kompetente atu bele tau atensaun.
Jornalista: Nelson de Sousa
Editór: Cancio Ximenes
