PNTL Viqueque garante seguransa iha selebrasaun Natál no Tinan Foun
VIQUEQUE, 24 dezembru 2024 (TATOLI)- Komadante Polísia Nasionál Timor Leste (PNTL), Munisípiu Viqueque, Superintendente, Antonio Rego Fernandes, informa, sei garante seguransa iha selebrasaun loron Natál 2024 no Tinan foun 2025 iha postu Uatulari no postu Viqueque Vila, munisípiu Viqueque.
“Fatin sira-ne’ebé ita identifka kada loron boot Natál mosu problema mak hanesan Uatulari, nune’e ami halo ona kordenasaun ho Padre sira kona-ba orariu misa nian. Área Uatilari ami sei tau atensaun seguransa no sei destaka membru PNTL sira ba fatin sira hanesan Igreja no kapela sira iha postu administrativu Uatulari bele iha establidade no dame iha festa Natál nian”, Komandante PNTL ne’e hateten ba TATOLI, iha postu Viqueque Vila, ohin.
Atu garante seguransa, nia dehan hahú sedunda (23/12) PNTL alerta katak sei halo operasaun konjunta iha munisípiu Viqueque hamutuk FALINTIL-Forsa Defeza Timor Leste (F-FDTL) to’o loron 27 Dezembru.
“Ohin ita-nia F-FDTL sesaun ida destaka ona iha Viqueque hodi apoia PNTL no Konsellu Polisiamentu Komunitária (KPK) sira iha kada suku hodi apoia seguransa, atu iha tempu Natál ne’e povu bele hakmatek livre ba partisipa misa iha loron 24 kalan no loron 25 dadersan. Depois husi operasaun ita sei observa maka situasaun iha Natál la’o normál, laiha pertubasaun ruma, ita sei dada fila operasaun konjuta. Operasaun konjuta realiza fali iha tinan foun. Tan ne’e, ha’u hakarak husu ba komunidade sira mantein hakmatek no kolabora ho seguransa hodi kria pás no establidade, atu ita selebra Natál ho di’ak”, nia sujere.
Sidadaun sira-ne’ebé kontra orden públiku hanesan halo barullu, hemu tua iha estrada públiku PNTL sei foti medida bazeia ba prosedimentu legal.
“Ha’u husu komunidade sira labele tiru fugete arbiru tanba bainhira tiru fugete iha tinan foun mak foin ita bele tiru. Nune’e se maka tiru arbiru fugete sira-ne’e, maka ami halo operasaun mak hetan sei kriminaliza”, nia alerta.
Ho oportunidade ne’e nia apela ba joven sira labele hemu tua iha prezepiu sira tanba prezepiu ne’e atu relembra fila fali Jesus nian moris.
“Tan ne’e, ita atu reflete Jesus nia-moris pasadu, la’ós hemu fali tua iha prejepiu okos, dansa no halo problema ida-ne’e ami sei kontrola hotu”. tenik nia.
Jornalista : Vitorino Lopes da Costa
Editór : Florencio Miranda Ximenes
