Estrada ligasaun Soibada-Natarbora hetan estragu difikulta movimentu transporte
DILI, 30 dezembru 2024 (TATOLI)—Estrada ligasaun husi Dili bá postu administrativu Soibada no Natarbora, munisípiu Manatuto iha parte Fatuk Manaun hetan estragu maka’as kauza husi rai no udan boot ne’ebé akontese iha loron 29 dezembru 2024.
Abitante lokál, Joanico Ulhada Costa, sente triste tanba estrada hetan estragu difikulta komunidade nia movimentu.
“Sente triste tebes tanba iha loron-boot ida-ne’e ita atu halo movimentu maibé estrada parte Fatuk Manaun (ai-kakeu) laran nian ne’e hetan estraga maka’as difikulta tebes movimentu transporte públiku nian bá-mai husi Dili bá-mai Soibada no Natarbora. To’o mai dalan ne’e só ema no motór de’it mak bele liu, maibé karreta liu labele,” Joanico hateten ba Agência Tatoli, via telefónika, segunda ne’e.
Notísia relevante : MOP Normaliza Ona Estrada Koneksaun Manatuto-Natarbora
Iha Sorin seluk, Administradora postu administrativu Soibada, munisípiu Manatuto, Terezinha da Costa Moniz, haktuir, dalan Fatuk Manaun hetan estragu maka’as, ne’ebé daudaun difikulta tebes movimentu transporte públiku, liu-liu karreta labele liu.
Nune’e, nia husu ba públiku, liu-liu komunidade husi Soibada no Natrbora halo movimentu karik tenke kuidadu tanba daudaun tempu udan no dalan ne’ebé hetan estragu ne’e transporte hanesan karreta labele liu só motór no ema la’o ain de’it mak bele liu.
“Husu ba komunidade ne’ebé halo viajen mai Soibada no Natarbora halai tenke kuidadu-an tanba agora tempu udan. Husu mós ita hotu nia kompreensaun no pasiénsia tanba agora loron ne’ebé ita labele husu apoiu emerjénsia ba Governu atu hadi’a dalan maibé hein loron-boot liu mak sei buka dalan atu rezolve nune’e halai matan moris neon nain,” nia dehan.
To’o notísia ne’e tun, Jornalista Agência Tatoli seidauk hetan konfirmasaun husi parte Ministériu Obra Públika tanba okupadu ho serbisu balun.
Jornalista : Arminda Fonseca
Editora : Julia Chatarina
