DILI, 14 janeiru 2024 (TATOLI)—Eskola sia iha munisípiu Ainaro hahú utiliza ona edifísiu foun ba ensinu aprendizajen.
“Eskola foun sia iha munisípiu Ainaro progresu 100% ona no hein ita halo pagamentu de’it. Mezmu seidauk halo pagamentu maibé ita-nia estudante utiliza ona dezde tinan kotuk,” Diretór Servisu Edukasaun munisípiu Ainaro, Patrício da Costa Magno, informa ba Agência Tatoli, iha ninia knaar fatin, Vila Verde, tersa ne’e.
Nia dehan, pagamentu tarde oituan tanba iha fallansu tékniku, ne’ebé iha funsionáriu balun seidauk asina kontratu tanba sei hein prosesu ne’e hotu hafoin bele halo pagamentu.
“Tanba ne’e ami hein oituan, funsionáriu tékniku simu tiha kontratu tiha lai. Nune’e, ami espera fulan ida-ne’e nia rohan bele halo pagamentu,” nia akresenta.
Notísia relevante : Obra konstrusaun eskola foun iha Ainaro sei entrega iha fulan-outubru
Projetu konstrusaun eskola foun sia ne’ebé konstrui ne’e mak hanesan pre-eskolár rua no restante eskola ensinu báziku hitu.
Konstrusaun eskola sia mak hanesan Pre-Eskolár Maubisse Vila, Pre-Eskolár Carreta Fatin, Eskola Ensinu Bázika Sentrál (EBC, sigla portugés) 04 Montanha, EBC 05 de Setembro Kasa, Eskola Ensinu Báziku Filiál (EBF) Luro, EBF Pader, EBF Maulefo, Pre- Eskolár Mane Lobat, no EBF Ahimata.
Tuir matadalan, molok foti osan, parte rua hala’o enkontru no husu atu aselera obra, nune’e bele aselera serbisu hodi halo konstrusaun sira-ne’e bele finaliza iha fulan-agostu no setembru.
Konstrusaun eskola ne’e hahú iha janeiru 2024, ho ninia kustu ba obra depende ba kondisaun hanesan sala tolu ninia kustu $80.000, enkuantu sala tolu inklui ho haris fatin, ho kustu $100.000-resin.
Antes ne’e, Diretór Nasionál Infraestrutura Bázika iha ME, Hélio Lopes, hateten ME prevee ona millaun $3 ba konstrusaun no reabilitasaun eskola iha teritórriu hamutuk projetu 20.
“Alokasaun ida-ne’e la’ós ona ba projetu komunitáriu maibé liuhusi prosesu aprovizionamentu ne’ebé sei jere husi kontratór ka kompañia sira-neʼebé tuir konkursu públiku. Daudaun ne’e, faze verifikasaun dokumentu tékniku no fulan-marsu bele ona iha konkursu públiku ba projetu foun 20. Projetu ne’e, ita sei realiza iha tinan ida-ne’e,” nia katak.
Jornalista : Osória Marques
Editora : Julia Chatarina
