iklan

INTERNASIONÁL, DESPORTU

Índia hakarak hala’o jogu “World Wrestling Entertainment” iha TL

Índia hakarak hala’o jogu “World Wrestling Entertainment” iha TL

Konselleiru no Enkaregadu Negósiu Timor-Leste ba Índia, Fransisco Maukura Fernandes, hasoru malu ho Great Khali husi Super Star World Wrestling Entertainment (WWE) iha Índia, hodi ko’alia kona-ba oinsá atu estabelese atividade desportu WWE bele hala’o iha Timor-Leste, kuarta (15 janeiru 2025). Imajen/Espesiál.

DILI, 15 janeiru 2024 (TATOLI)—Konselleiru no Enkaregadu Negósiu  Timor-Leste ba Índia,  Fransisco Maukura Fernandes, kuarta ne’e, hasoru malu no enkontru ho Great Khali husi Super Star World Wrestling Entertainment (WWE) iha Índia, hodi diskute kona-ba oinsá atu hala’o atividade desportu ka jogu WWE iha Timor-Leste.


“Ohin, ha’u simu konvite ida husi Great Khali, WWE India Super Star, iha enkontru ne’e ami diskute kona-ba posibilidade atu iha future, nia bele vizita Timor Leste tanba sira hakarak estabelese jogu desportivu WWE iha ita-nia nasaun,” Fransisco Maukura hateten ba Agência TATOLI liuhusi WhatsApp, kuarta ne’e.

Nia dehan, durante enkontru ne’e sira ko’alia mós kona-ba relasaun entre povu Timor-Leste ho Governu no ko’alia mós kona-ba esforsu Governu Kaonstitusionál da-sia (IX) iha dezenvolvimentu infraestrutura bázika inklui desportu.

“Ha’u mós fó ha’u-nia opiniaun, se ba oin Timor-Leste bele koopera iha modalidade WWE nian, atu nune’e bele sai uma na’in ba atividade desportu ne’e, atu nune’e bele ajuda promove Timor-Leste,” nia dehan.

Nia hatutan, ezisténsia desportu ne’e bele motiva jerasaun foun sira, atu ema hotu bele dezenvolve sira-nia talentu ne’ebé iha ona, nune’e bele kontribui ba estabilidade no dezenvolvimentu nasionál.

Istória badak jogu WWE


Atividade desportu ka jogu World Wrestling Entertainment (WWE). Imajen/Espesiál.

Jogu World Wrestling Entertainment (WWE) mak empreza divertimentu luta nian ne’ebé boot-liu iha mundu ne’ebé mak kria ona istória naruk iha indústria divertimentu desportu nian.

Eventu desportivu ida-ne’e bele atrai atensaun hodi aprezenta jogu sira-ne’ebé di’ak-liu no WWE nia viajen naruk ba dominasaun globál.

Jogu WWE hahú hala’o iha dékada 1950 bainhira Jess McMahon no Toots Mondt harii Capitol Wrestling Corporation (CWC) iha Estadu Unidu.

Maibé, mudansa boot ida akontese iha 1982, bainhira Vincent Kennedy McMahon, ka Vince McMahon kaer empreza no muda nia naran ba World Wrestling Federation (WWF). Mudansa ida-ne’e ikus mai halo eventu ida-ne’e sai moris no populár liután ho ema barak.

Dezenvolvimentu WWE

Kompañia hetan kreximentu lalais iha lideransa husi Vince McMahon Jr. ida ne’ebé ambisiozu. Iha 2002, empreza muda nia naran ba World Wrestling Entertainment (WWE) hafoin lakon funu legál direitu autór nian ho World Wildlife Fund (WWF).

Aleinde ne’e, WWE mós lansa programa televizaun oioin hanesan “Monday Night Raw” no “SmackDown”, ne’ebé sai populár tebes iha mundu tomak. Ida-ne’e mak dezenvolvimentu ida-ne’ebé mak estraordináriu tebes no halo eventu ida-ne’e sai koñesidu liután.

WWE sai koñesidu ho nia era prinsipál rua: Era Atitude iha finál dékada 1990 no inísiu dékada 2000, no Era PG ne’ebé hahú iha dékada 2000 nia klaran.

Era Atitude koñesidu ba nia konteúdu ne’ebé maduru liu no polémika liu, enkuantu Era PG subliña konteúdu ne’ebé amigavel liu ba família ne’ebé apropriadu vale ba idade hotu-hotu.

Tranzisaun era nian mós halo eventu ida-ne’e sai merese liután atu uza hanesan espetákulu desportivu no divertimentu nian. Ida-ne’e aumenta lukru tanba sei atrai ema barak husi sírkulu oioin.

Jornalista : Hortencio Sanchez

Editór        : Cancio Ximenes

iklan
iklan

Leave a Reply

iklan
error: Content is protected !!