iklan

EDUKASAUN

Estudante Institutu São João de Brito 125 simu graduasaun

Estudante Institutu São João de Brito 125 simu graduasaun

Estudante finalista Institutu São João de Brito (ISJB) hamutuk 125 simu graduasaun, sesta (17 janeiru 2025). Imajen/Espesiál.

LIQUIÇA, 17 janeiru 2025 (TATOLI)—Estudante finalista Institutu São João de Brito (ISJB) hamutuk 125, sesta ne’e, simu graduasaun.

ne’ebé lokaliza iha Casait, suku Ulmera, postu sdministrativu Bazartete, munisipiu Liquiça, sesta ne’e, fó ona graduasaun ba estudante hamutuk na’in-125.

Magnífiku Reitór ISJB Pe. Isais Abilio Caldas, hateten serimónia graduasaun ne’e realiza ba da neen (6) ona hahú husi 2019 to’o ohin loron no estudante ne’ebé ohin simu graduasaun mai hosi departamentu haat (4) hanesan Portugés, Inglés, Religiaun no Matematika.

“Ha’u Reitór foun, foin asume kna’ar ne’e iha tinan kotuk maibé ita nia eskola ne’e halo ona graduasaun ba estudante sira d-neen (6), nune’e totál estudante ne’ebé gradua ohin hamutuk 125,” Reitór ne’e hateten ba jornalista sira.

Estudante finalista Institutu São João de Brito (ISJB) hamutuk 125 simu graduasaun, sesta (17 janeiru 2025). Imajen/Espesiál.

Nia husu ba graduadu sira atu utiliza matenek ne’ebé iha ho responsabilidade hodi aplika iha fatin ne’ebé de’it, tanba haree ba ISJB iha de’it fakuldade edukasaun de’it entaun husu ba graduadu sira bainhira hetan oportunidade hanorin iha eskola sira tenke ho responsabilidade.

Oradór prinsipál no atuál Primeiru-Ministru, Kay Rala Xanana Gusmão, husu ba estudante sira simu matenek ne’ebé iha ho responsabilidade hodi serbíi nasaun ida-ne’e.

“Graduadu sira, imi nia fakuldade edukasaun, agora imi sai Profesór, ida-ne’e misaun ida, misaun ida atu kaer imi-nia kna’ar ho responsabilidade. Ba hanorin la’ós atu buka osan maibé ho responsabilidade ba rai ida-ne’e,” Xanana hateten.

Xanana fiar katak ida-ne’e susar no todan no maske nune’e ida-ne’e mak viajen nesesáriu atu agora kumpre nia destinu atu serbí nasaun, liuhosi ita-boot sira-nia prezente ne’ebé espesiál tebes mak eduka.

Karik viajen tuir mai ne’ebé ita-boot sira atu hahú profisionál, pesoál no mezmu hanesan “peregrinu” São Inácio de Loyola, espirituál halo ho korajen, étika, maibé mós ho paixaun.

Nia dehan, laiha buat ida mak rekompensativu liu duké moris ida ho objetivu, aliña imi-nia valór sira ba imi-nia asaun sira. Laiha buat ida mak rekompensativu liu duké nafatin kontinua aprende, esplora no kontribui ba transformasaun mundu nian.

“Ha’u hein, ho antisipasaun boot katak graduadu sira ohin nian sei sai
líder aban-bainrua nian, ne’ebé forma líder sira jerasaun sira tuir mai nian ho valór sira di’ak ne’ebé metin iha sira nia fuan no iha sira nia liafuan sira. Ita-boot sira sei la sai de’it edukadór sira maibé mós inspiradór ida. Ita-boot nia talentu no koñesimentu ne’ebé hetan bele iha impaktu úniku ba joven sira no komunidade ne’ebé sira sei serbí,” nia dehan.

Tanba ne’e, nia husu graduadu sira atu sai kontribuisaun ezemplár ne’ebé Timor-Leste presiza iha prosesu konstrusaun Estadu no nasaun.

Estudante husi departamentu Inglés ne’ebé hetan Cumlaude, Nilton Nicson, hato’o agradesimentu ba manorin hotu ne’ebé durante ne’e dedika-aan tomak hodi hanorin estudante sira to’o ikus bele finaliza estudu.

“Agradese ba parte hotu, liuliu ba manorin sira. Imi la hatene kole hodi hanorin ami, matenek ne’ebé imi fo mai ami sei la lakon, ami sei ba aplika fali iha fatin ne’ebé presiza. Ba inan-aman sira agradese tebes ba imi-nia apoiu, mak ohin loron ami termina ami-nia estudu. Ba kolega no familia sira hotu obrigadu no agradese,” nia dehan.

Entretantu, institutu ne’e iha de’it Fakuldade Edukasaun fahe ba departementu Inglés, Portugés no Edukasaun relijioza.

Insitutu São João de Brito Casait harii iha tinan 2016 liubá no iha grupu primeiru ne’ebé gradua iha tinan 2020 hamutuk na’in-14 iha fakuldade edukasaun no to’o agora estudante ne’ebé gradua iha ISJB liu ona 300.

Jornalista : Hortencio Sanchez

Editór        : Cancio Ximenes

iklan
iklan

Leave a Reply

iklan
error: Content is protected !!