Rezultadu lista validasaun veteranu rejistadu 2009 iha Viqueque hamutuk 5.920
VIQUEQUE, 17 janeiru 2025 (TATOLI)—Prezidente Konsellu Kombatente Libertasaun Nasionál (CCLN, sigla portugés) munisípiu Viqueque, Adriano Camara “Lentil”, informa rezultadu verifikasaun lista validasa (editál) ba veteranu rejistadu 2009 iha munisípiu Viqueque ne’ebé rejista tinan 2009 ne’e totál hamutuk 5.920.
Notísia Relevante: Governu taka sai ona lista validasaun kombatente libertasaun hamutuk 92.591
“Iha prosesu rejista iha tinan 2009 kombatente hamutuk rihun 7.775. Maibé, hahú halo verifikasaun iha tinan 2019, mosu konflitu partidu entaun prosesu verifikasaun ita hadi’a. Depois, ita halo verifkasaun fali iha 2022, 2023 to’o 2024 no hafoin verifikasaun ramata, nune’e rezulta sira-ne’e mak ita taka sai iha loron 15 janeiru 2025. Totál kombatente iha Viqueque validu hamutuk rihun 5.920,” Prezidente CCLN ne’e hateten ba jornalista sira, iha ninia kna’ar fatin Viqueque Vila, ohin.
Lista editál ne’ebé taka sai daudaun iha edifísiu CCLN no edifísiu Autoridade Munisipál Viqueque ne’e, kombatente sira ida-idak ba haree karik mosu reklamasaun foti formuláriu iha CCLN hodi prinxe kontestasaun ida-idak lori formuláriu ba aprezenta iha nasionál.
“Ba kombatente sira-ne’ebé dadus sala, tenke halo reklamasaun hodi hadi’a fali dadus sira-ne’e. Kona-ba dadus ne’ebé taka sai daufaun, iha ema balun menoridade ne’ebé moris iha tinan1990 no 1991, munisípiu rejista hotu no aprova maibé avaliasaun ne’e iha nasionál ne’ebé atu tama kritériu sai kombatente ka lae, ne’e nasionál mak hatene tanba sira mak halo avaliasaun,” nia dehan.
Iha prosesu verifikasaun, nia dehan, lista naran tuir grau sira-ne’ebé daudaun ne’e taka sai ne’e kompostu husi grau 8-15, bainhira submete ba nasionál ne’e ekipa verifikasaun sira avalia hodi hatun ba fali grau 3-7 no balun menus husi tinan tolu (3).
“Ida-ne’e mak sai dúvida ba sira-ne’ebé halo verifikasaun. Ami mós simu orientasaun husi nasionál katak dadús kombatente balun la loos, sira tenke foti formuláriu kontestasaun iha ami, depois sira lori ba nasionál mak sira halo analiza ba dadús sira-ne’e. Bele ka labele ne’e kompeténsia nasionál, la’os kompetensia ami munisípiu nian. Nune’e, hahú husi taka sai lista naran ne’e, reklamasaun barak ona maibé ami distribui de’it formaláriu ba sira. Ne’ebé, ate agora ami la konta dadús reklamante ne’e ema na’in hira,” nia dehan.
Nune’e, nia dehan, prazu ba reklamasaun durante loron 60 maibé liu ida-ne’e labele ona, tanba ne’e husu ba kombatente sira tenke haree lalais sira-nia dadús no hafoin ida-ne’e hahú halo pagamentu ba kombatente sira.
Nia relata, dadús sira-ne’ebé agora tau sai ne’e hahú grau 1, grau 3, 15-19, 24 anos, 8-14, 3-7, balun hetan tiru kanek no martir sira.
Tuir dadús, kombatente husi munisípiu Viqueque ne’ebé rejista iha tinan 2009 ho totál hamutuk na’in-7.775 no kombatente ne’ebé lista naran editál hamutuk na’in-5.920.
Husi rezultadu lista validasaun ba kombatente iha Viqueque ne’e kompostu husi postu administrativu Viqueque hamutuk na’in-1.442, Uatulari na’in-1.868, Uatucarbau na’in-617, Ossú na’in-1.501 no postu Lacluta hamutuk na’in-512.
Jornalista : Vitorino Lopes da Costa
Editór : Cancio Ximenes
