BOBONARO, 20 janeiru 2025 (TATOLI)—Muzeu Memoriál Munisipál Bobonaro, hahú husi janeiru to’o dezembru 2024, rekolla ona narrativa funu husi kombatente no sobrevivente na’in-38 ne’ebé entrega objetu funu nian hanesan Espada rua, Sanan-Rai no Fotografía ne’ebé sira utiliza iha períodu funu 1975-1999.
Koordenadora Muzeu Memoriál Munisipál Bobonaro, Marciana Gouveia Leite, hateten iha dadus no objetu hirak ne’e rekolla iha postu administrativu Cailaco, Maliana ho postu administrativu Loloto’e no daudaun ne’e prezerva ona iha Centro Nacionál Chega, Institutu Públiku (CNC, I.P, sigla Portugués) Dili.
Notísia Relevante: Muzeu Memoriál Bobonaro rekolla ona narrativu hosi sobrevivente 11
“Narrativu ne’ebé ami arkiva no prezerva ona hamutuk 38 kompostu husi Feto lima, Mane 33,” Nia informa ba Agência Tatoli iha nia kna’ar fatin, segunda ne’e.
Tuir planu anuál 2024, Muzeu Memoriál Munisipál Bobonaro hakarak entervista veteranu, sobrevivente na’in 40 maibé la konsege atinje alvu tan enfrenta problema no difikuldade hansan laiha orsamentu ba viajen lokál no transporte.
Iha tinan ne’e, nia dehan, sei esforsu atu kobre fali postu administrativu sira hansan postu Atabae no postu Balibo hodi rekolla narrativa no objetu funu nian husi luta-na’in sira.
“Muzeu ne’e harii kle’ur ona, ema barak mak hatene ona ezisténsia muzeu ne’e. Soké, ema barak mak seidauk iha konsiénsia atu hakat mai fó sira-nia testamuña ka sira-nia istóriá pasada nian. Entaun, ha’u husu ba joventude, veteranu no sobrevivente sira bele hakat mai fó ita-boot sira-nia istóriá, atu nune’e bele prezerva. Se la agora, bainhira tan mak ita atu prezerva, tanba ita-nia aman veteranu sira barak mak hansan loromatan ida karik komesa tun ona, ” nia dehan,
Entretantu, aktividade esensiál Muzeu Memoriál Munisipál Bobonaro iha 2024 mak hanesan induzaun, rekolla narrativa no objetu funu husi veteranu no sobrevivente, simu vizitante lokál no estranjeiru.
Vizitante ne’ebé konsege vizita muzeum iha 2024 ne’e hamutuk 237 ne’ebé kompostu husi estudante, profesór, líder komunitária, veteranu, sobrevivente no vizitór estranjeiru sira seluk.
Muzeu refere estabelese husi Governu liuhusi Centro Nacional Chega, Institutu Públiku (CHEGA, I.P, sigla portugés) no inaugura iha 28 novembru 2024, ho objetivu atu prezerva dokumentu istóriku períodu 1974-1999 no fasilita informasaun kona-bá istória pasada ba públiku.
Notísia Relevante: Muzeu Bobonaro sei implementa atvidade tolu iha 2024
Jornalista : Sérgio da Cruz
Editór : Cancio Ximenes