OÉ-CUSSE, 20 Janeiru 2025 (TATOLI) – Diretór Edukasaun iha Rejiaun Administrativa Espesiál Oé-Cusse Ambeno (RAEOA), Vincencio Cono, klarifika kona-bá sirkulár ne’ebe fó sai husi Diresaun Edukasaun Rejionál Oé-Cusse katak obrigatoriamente funsionáriu edukasaun inklui profesór tenke kontribui osan hahú husi $5 to’o $20 hodi simu vizita mahein edukasaun “São João Paulo II” iha fulan-Fevereiru.
“Kobransa ba profesór sira iha Oé-Cusse ne’e, la’ós kobransa ilegál maibé kontribuisaun atu simu mahein edukasaun São João Paulo II, atu mai, ida-ne’e mós hetan koñesimentu husi Ministériu Edukasaun, tanba iha fulan-Fevereiru, Edukasuan Oé-Cusse simu Mahein edukasaun nian, ne’ebé ami-nia kontribuisaun ne’e atu tulun komisaun organizadora,” Diretór Edukasaun Oé-Cusse, Vincencio Cono, ba Ajénsia Tatoli iha Oé-Cusse, ohin.
Diretór Edukasaun Oé-Cusse ne’e halo klarifikasaun relasiona ho informasaun balun ne’ebé ema iresposabilidade sira lansa no espalla iha mídia sosial katak kobransa ne’e ilegál.
“Ami hato’o ona ba Ministru Edukasaun, ne’ebé kobransa ne’e la’os ilegál, maibé nu’udar sarani tenke kontribui atu simu mahein edukasaun mak Santo São João Paulo II mai Oé-Cusse,” nia klarifika.
Kontribuisaun husi profesór sira hahú husi dolár $5 ba funsionáriu, guarda, cleaner no profesór tantu permanente no kontratadu.
Kontribuisaun ba $10, kabe ba koordenadór eskola, xefe sesaun ne’ebé hetan subsídiu kargu no $15 ba adjuntu Diretór eskola ne’ebé hetan subsídiu kargu $20 ba Diretór Rejionál Xefe Departementu iha Edukasuan no Inspetór Edukasaun.
Diretór ne’e informa, atividade dahuluk atu simu ho kultura Oé-Cusse nian, sei komunika ho parte Igreja,hafoin misa hamutuk ho Don Virgilio Cardeál do Carmo.
Daruak, orsamentu ne’ebé kobra ba kada profesór sira, atu uza ba akompañamentu husi eskola tanba sei iha Oé-Cusse tinan tomak, tan ne’e orsamentu ne’e sei uza husi eskola ida ba eskola seluk, liuliu ba transporte ne’ebé mak presiza no ai-han inklui bee-moos.
“ Prezensa mahein ne’e atu mai kuda morál ba inan-aman estudante no profesór sira, liuliu funsionáriu sira iha edukasaun,”nia afirma
Orasamentu ne’ebé kobra ne’e, nia dehan Edukasaun RAEOA sei halo relatóriu hotu hodi lansa ba ema hotu atu asesu.
Jornalista: Abílio Elo Nini
Editór: Florencio Miranda Ximenes
