iklan

INTERNASIONÁL

TL partisipa Corporate Governance Excelent Summit iha Índia

TL partisipa Corporate Governance Excelent Summit iha Índia

Governu Timor-Leste ne’ebé reprezenta husi Konselleiru no Enkaregadu Negósiu ba Índia Francisco Maukura Fernandes partisipa iha Corporate Governance Excelent Summit ne’ebé realiza hosi Asociation Small and medium emprises India foin lalais ne’e. Imajen/Espesiál.

DILI, 21 janeiru 2025 (TATOLI)–Governu Timor-Leste ne’ebé reprezenta husi Konselleiru no Enkaregadu Negósiu ba Índia Francisco Maukura Fernandes partisipa iha Corporate Governance Excelent Summit ne’ebé realiza hosi Asociation Small and medium emprises India foin lalais ne’e.

“Ha’u simu konvite husi Asociation Small and medium emprises Índia ba partisipa iha corporate Governance Excelent Summit iha Pune Bumbai, Índia iha 18 janeiro 2025. Atividade ne’e partisipa husi CEO (Chief Executive Officers) na’in-800 iha Índia, sira-ne’e emprezáriu sira hotu iha área sektoriál business oioin, nune’e mós hanesan potensia business ba oin. Atividade ne’e ko’alia liu kona-ba investimentu no importante tebes ba ita atu partisipa hodi ko’alia oinsá dada investór sira atu ba investe iha ita-nia nasaun,” Maukura hateten ba Agência TATOLI liuhusi WhatsApp, tersa ne’e.

Nia dehan, enkontru nivél aas ne’e partisipa mós husi Embaixador Rwanda, El Salvador, Ecuador, Ethiopia, Nambia, Venezuela no Enkaregadu Negósiu Embaixada Timor-Leste.

“Iha konferensia ne’e ha’u mós sai hanesan panel sesaun diskusaun hodi ko’alia kona-ba dezenvolvimentu nasionál no poténsiaa empreza kiik sira iha Timor-Leste,” nia dehan.

Governu Timor-Leste ne’ebé reprezenta husi Konselleiru no Enkaregadu Negósiu ba Índia Francisco Maukura Fernandes partisipa iha Corporate Governance Excelent Summit ne’ebé realiza hosi Asociation Small and medium emprises India foin lalais ne’e. Imajen/Espesiál.

Nia hateten, tuir konversa ne’ebé nia halo ho empreza sira iha Índia ne’e hateten Timor-Leste presiza investe iha setór produtivu sira hanesan ótelaria, turizmu, argrikultura, industria finanseira, tekonolojia informatika no seluk tan.

“Ha’u konsege ko’alia ho investór na’in-haat iha iha ne’e, sira iha interrese atu investe iha Timor-Leste maibé sira hakarak liu iha ótelaria hodi apoiu industria turizmu,” nia hateten.

Iha tempu besik, nia dehan, sira sei visita Timor-Leste atu haree kondisaun Timor-Leste nian, karik iha interrese bele ko’alia kedan ho Ministeriu relevante atu bele fasilita halo sira-nia investimentu.

Kooperasaun TL-Índia

Antes ne’e, delegasaun Índia nian ne’ebé kompostu husi Embaixadór Extraordinariu no Plenipotensiariu Índia ba Timor-Leste, Gurjit Singh ho grupu emprezáriu sira husi India ne’ebé konsentra iha área esplorasaun mineira, industria no konstrusaun nian hasoru ona Governu Timor-Leste hodi ko’alia kona-ba investimentu no hametin kooperasaun entre nasaun rua.

Reuniaun ida-ne’e hanesan segimentu ba vizita ne’ebé mak Embaixadór India nian halo iha Timor-Leste, nune’e iha reuniaun Bali Democracy Forum. Iha ne’ebá, ko’alia kona-ba asuntu tolu: ida mak visita delegasaun emprezariu Índianu sira mai Timor-Leste, asuntu ida mak kona-ba estabelesimentu sentru IT nian iha Dili no ikus-liu kona-ba sira-nia hakarak hetan ema ida ba sira-nia Konsul Honorariu iha Timor-Leste.

Governu Índia iha interrese hakarak habelar liután koperasaun ho Timor-Leste. Governu India mós hakarak fó tratamentu espesiál ba Timor-Leste nia produtu sira-ne’ebé atu tama ba Índia ho kondisaun free tariff ka la kona taxa.

Akompaña Embaixador Extraordináriu no Plenipotensiariu, Gurjit Singh iha vizita ne’e mak investór sira-ne’ebé mai husi kompañia boot ne’ebé involve iha konstrusaun ba kamiñu ferro, aeroportu, esplorasaun mineiru no agrikultura.

Prezidente índia vizita TL

Antes ne’e, iha 10 agostu 2024, Prezidente Índia, Droupadi Murmu, hala’o vizita ofisiál mai Timor-Leste, ne’ebé nu’udar vizita dahuluk Xefe Estadu indianu nian mai nasaun ne’e. Durante ninia estadia iha Timor, realiza sorumutu altu nivel sira-ne’ebé hamosu akordu bilaterál importante no reforsu relassaun entre país rua ne’e.

Vizita ne’e ho resesaun ofisiál ida iha Palásiu Prezidensiál Nicolau Lobato, iha ne’ebé Prezidente Droupadi Murmu simu husi Prezidente Repúblika, José Ramos Horta. Tuir kedas ho sorumutu bilaterál ida iha ne’ebé ko’alia kona-ba kooperasaun iha área oioin hanesan teknolojia, agrikultura, saúde, defeza, infraestrutura no edukasaun.

Iha enkontru ida-ne’e, Prezidente Ramos Horta kondekora Prezidente Murmu ho medalla Orden Timor-Leste, Grande Colar, hodi fó rekoñesimentu ba ninia lideransa no kontribuisaun atu hametin relasaun entre país rua ne’e. Sira diskute mós kona-ba instalasaun futura Embaixada Timor-Leste nian iha Índia no Índia nian iha Timor-Leste.

Prezidente Índia ba Palásiu Governu hodi hala’o sorumutu ho Primeiru-Ministru, Kay Rala Xanana Gusmão, iha prezensa husi membru Governu Konstitusionál IX nian balun.

Iha sorumutu ida-ne’e, asina akordu tolu: Akordu ida kona-ba Izensaun Vistu ba Titulár Pasaporte Diplomátiku no Servisu, Memorandu Entendimentu ida kona-ba Programa Interkámbiu Kulturál ba tinan 2024-2028 no Memorandu Entendimentu ida kona-ba Kooperasaun iha Radiodifuzaun entre Rádiu no Televizaun Timor-Leste (RTTL) no Prasar Bharati, husi Índia.

Durante sorumutu ho Xefe Estadu Índia nian, Primeiru-Ministru Xanana Gusmão hato’o ninia gratidaun ba apoiu Índia nian ba Timor-Leste durante luta ba ukun rasik-aan, ko’alia-liu mós kooperasaun kontínua iha área estratéjika sira hanesan edukasaun, saúde no agrikultura.

Molok han-kalan ofisiál, ne’ebé Prezidente Repúblika, José Ramos-Horta oferese, iha Palásiu Nobre Lahane, Prezidente Índia partisipa iha talk show “Horta Show”, ne’ebé hala’o iha Salaun Nobre Ministériu Negósiu Estranjeiru no Kooperasaun nian.

Eventu ida-ne’e proporsiona plataforma ida hodi diskute kooperasaun rejionál no internasionál, liuliu kona-ba adezaun Timor-Leste ba ASEAN, ne’ebé prevee ba tinan 2025, hetan apoiu makaas husi Índia.

Vizita ida-ne’e inklui iha dezlokasaun lubun ida ba rejiaun Pasífiku, ne’ebé inklui mós vizita ba Fiji no ba Nova Zelándia.

Jornalista : Hortencio Sanchez

Editór      : Cancio Ximenes

iklan
iklan

Leave a Reply

iklan
error: Content is protected !!