DILI, 22 janeiru 2025 (TATOLI)-Diretór Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício, hatete ema na’in-55 mak sai benefisiáriu ba programa bolsa parsiál husi FDCH.
“Programa bolsu parsiál ne’e depende ba nesesidade, haree mós ba prioridade Governu. Konsellu administrasaun aprova ona ho orsamentu 2025 nia no prepara ba ema na’in 55”, Júlio Aparício dehan nia kna’ar fatin Kolmera, kuarta ne’e.
Nia hatutan, benefisiáriu sira-ne’e na’in 16 mak estuda iha rai-laran. “Sira hotu kontinua iha Portugál, Malázia, Filipina, Singapura, Tailándia, Austrália no Nova Zelándia”.
Nia dehan bolseiru sira-ne’e fahe bá área prioridade ne’ebé Governu presiza, liu-liu iha área saúde, enjenaria, agrikultura, edukasaun, ospitalidade, turizmu. Atu koloka bolseiru sira-ne’e FDCH mós sei kordena ho liña ministeriál, nune’e haruka ema sira-ne’e ba mai fali sira tenke servisu ho Governu no kontribui ba rai ida-ne’e. Ida-ne’e regra no prosedimentu FDCH.
Nia hatete bolseiru sira-ne’e preparadu ona no hein prosesu anu letivu tinan ne’e nian, tantu rai-laran no rai-li’ur.
Nia dehan tinan 2025 nia orsamentu millaun $13 resin mak hodi selu ba bolseiru na’in 55 ne’e.
Júlio Aparício hatete, benefisiáriu ba programa bolsa parsiál anteriór ne’e na’in 80-resin mak gradua ona no aprezenta-án ona ba FDCH.
“Finalista sira-ne’e gradua ona no entrega ba governu mak iha kompeténsia no responsabilidade utiliza sira ka oinsá maibé graduadu mós bele kria rasik kampu traballu ba án”, afirma.
Benefisiáriu sira iha Institutu Superiór Kristal ne’e nain-10 mak gradua ona iha área enfermajen nian. Husi Universidade Dili (UNDIL) hamutuk 15, hosi Dili Institute of Technoly (DIT) 20, Universidade Orientál Timor Lorosa’e (UNITAL) área saúde mós hamutuk 12, no iha universidade no institutu seluk mós.
Nia dehan FDCH nafatin apoiu sira-ne’ebé seidauk finaliza. “Ita-boot sira prepara-án tanba ita-nia estudu governu fó ona fundu hodi fasilita entaun aproveita didi’ak oportunidade ida-ne’e hodi hasa’e ita-boot sira-nia matenek iha área oin-oin”.
Jornalista : Osória Marques
Editór : Zezito da Silva