BOBONARO, 23 janeiru 2025 (TATOLI)—Autoridade postu administrativu husu Governu liuhusi Ministériu Obra Públika iha tinan ne’e halo manutensaun ba estrada diresaun Balibo Vila ba Batugade tanba estrada ne’e kondisaun aat kuaze distánsia kilómetru 13.
Notísia Relevante: MOP sei halo manutensaun estrada Batugade-Balibo to’o Maliana
“Ha’u rekomenda ba Governu sentrál, tempu badak bele tau-matan lalais tanba haree estrada ne’e besik iha liña fronteira ne’e hanesan dignidade nasaun nian. Karik, ema estranjeiru mai vizita ita-nia munisípiu, ema tama husi Mota-Ain mai kontente, depois husi rotunda Batugade sa’e mai ema komesa triste ona. Entaun Governu sentrál tenke tau prioridade ba ida-ne’e,” Nia informa ba Jornalista sira iha nia kna’ar fatin, kinta ne’e.
Administradór ne’e haktuir, foin lalais nia parte husu apoiu ba kompañia lokál balun halo normalizasaun ba estrada iha subida área Fatuk Kaka’e nia okos, tanba udan difikuldade tebes movimentasaun públiku.
“Agora, ita haree sei di’ak uitoan, se lae subida uitoan ne’e difikulta tebes kamioneta sira atu mai. To’o uitoan ne’e, sira hotu dada-iis. Husi Atambua ka Dili hanesan, to’o iha fatin ne’e sira tenke para tanba fatin ne’e susar duni,” nia hateten,
Iha fatin seluk, reprezentante komunidade Balibo, José Antonio Barreto, sente triste tanba estrada Balibo-Batugade nu’udár estrada protokolu ne’ebé liga husi munisípiu ba nasionál no nasaun viziñu Indonézia.
“Estrada ne’e hela rohan de’it ona, tanba saida mak halo balun, depois balun husik hela, ida-ne’e la justu. Ne’ebé, ami povu nia hakarak mak ne’e, ita-nia Governu tenke tau-matan lalais, tanba ema viajen ba-mai ne’e kuandu to’o Batugade ka Balibo ne’e laran susar loos. Tanba, estrada ladi’ak, besik oan ne’e mós ita la’o ba-mai bele to’o oras ida-nia laran ne’e,” nia dehan.
Tuir observasaun husi Agência Tatoli iha terrenu notak katak, movimentasaun transporte públiku no privadu kontinua la’o normál maibé alkatraun ne’ebé iha Indonézia nia temu nahe ba estrada ne’e kuaze balun nakloke no balun atu lakon ona, no hela de’it fatuk ruin no rai.
Tuir dadus monografia 2021 postu administrativu Balibo iha aldeia 27, suku neen (6) mak hanesan Sanirin, Cowa, Leo-lima, Leo-hitu, Balibo Vila no Batugade ho totál populasaun 19,869 no totál uma-kain 4,708.
Notísia Relevante: MOP submete pedidu asesu fundu impréstimu reabilita estrada Batugade-Balibo
Jornalista : Sergio da Cruz
Editór : Cancio Ximenes
