Ministru Bendito-Ministra Catherine diskute kooperasaun iha área kapasitasaun rekursu umanu
DILI, 24 janeiru 2025 (TATOLI)—Ministru Negósiu Estranjeiru no Kooperasaun (MNEK) , Bendito Freitas ho Ministra Parliamentary Under Secretary of State (Indo-Pacific) at the Foreign Commonwealth and Development office of the United Kingdom, Catherine West, diskute relasaun bilaterál entre Timor-Leste ho Reinu Unidu oinsá atu haree liu kona-ba kapasitasaun rekursu umanu.
“Oportunidade di’ak ba ita hasoru malu ho Ministra husi Reinu Unidu nian mai vizita ita, pontu importante balun ne’ebé ami ko’alia mak oinsá haree ba kooperasaun bilaterál ne’ebé presiza reforsa liután no ita foku liu kona-ba kapasitasaun rekursu umanu nu’udar elementu ida importante tebes ba ita-nia adezaun ba ASEAN,” Ministru Bendito hateten ba jornalista iha edifisiu MNEK Praia dos Coqueiros, kinta (23 janeiru 2025) ne’e.
Nia dehan, Governu Britániku dezde-uluk kedan fó apoiu ba Timor-Leste ba kapasitasaun rekursu umanu bainhira nasaun ne’e harii nia Estadu iha tinan 20 ba kotuk.
“Sira prontu atu apoiu kapasitasaun rekursu umanu ba ita-nia diplomata sira, hanesan fó formasaun ba lian inglés, diplomasia, teknikamentu kona-ba negosiasaun nian nomós asuntu seluk kona-ba kooperasaun ne’ebé ita presiza tebes,” nia dehan.
Nia hatutan, Reinu Unidu hanesan nasaun ida husi membru na’in-lima ne’ebé permanente iha konsellu seguransa Nasaun Unida nian no sira-nia lian forte tebes iha liña globál.
“Ita rona husi sira kona-ba dezafiu globál ne’ebé mundu ohin loron hasoru. Maibé ita koko atu husu posibilidade ba sira atu tetu, tanba ita aplika ona ba injensaun vistu ba pasaporte diplomátiku no pasaporte servisu nian. Diplomata husi sira-nia enjoy ona kona-ba tratamentu ida ne’e husi ita-nia parte Governu Timor, entaun ita espera husi sira-nia parte Ministra fó garantia nune’e husi sira-nia Embaixadór iha Jakarta-Indonézia sira haree hela asuntu ida-ne’e,” nia dehan.
Iha parte seluk, parte rua ko’alia mós kona-ba intensaun Reinu Unidu nian atu estabelese Embaixada Britániku iha Timor-Leste.
“Ami mós ko’alia hela kona-ba oinsá sira atu harii sira-nia Embaxada iha ne’e, ita sei konsulta ho parte hotu liuliu Ministeriu Justisa atu haree fatin ruma di’ak ba sira, atu nune’e sira re-abertura fali sira-nia misaun diplomátika iha ne’e. Iha enkontru ne’e, ita husu ba sira-nia Governu iha ne’ebá atu tau matan ba ita-nia traballadór sira, karik iha difikuldade no dezafiu ruma sira hasoru Governu Britániku bele tulun,” nia relata.
Iha okaziaun ne’e, Governante nasaun rua ne’e ko’alia mós kona-ba setór ekonomia liuliu iha área peska no ba futuru sei iha diskusaun nivel tékniku entre Governu rai rua.
Jornalista : Hortencio Sanchez
Editór : Cancio Ximenes
