Timor-Leste kongratula povu Índia komemora loron Repúblika ba da-76
DILI, 28 janeiru 2025 (TATOLI)—Timor-Leste kongratula Estadu no povu Índia ne’ebé selebra loron Repúblika Índia ba da-79 ne’ebé realiza iha Palásiu Prezidensiál Índia, iha domingu (26 janeiru 2025) ne’e.
“Ita hetan konvite espesiál, entaun Embaixada RDTL iha New Delhi, Índia partisipa resepsaun komerasaun loron Repúblika India nian ba da-76, no lori Estadu Timor-Leste nia naran hato’o parabéns ba povu Índia. Iha serimónia ne’e, ita hasoru Prezidente Índia Droupadi Murmu no Primeiru-Ministru Nahendra Modi ne’ebé hato’o kumprimentu ba ita-nia Xefe Estadu José Ramos Horta no Primeiru-Ministr Kay Rala Xanana Gusmão,” Enkaregadu Negósiu iha Índia Francisco Dionisio Fernandes ‘Maukura’, hateten ba Agência TATOLI liuhusi WhatsApp, tersa ne’e.
Durante serimónia ne’e, nia hetan mós oportunidade hodi ko’alia mós ho Jaysankar, Ministru Asuntu External Índia nian ne’ebé hato’o agradesimentu ba apoio tomak Índia nian ba estabelese embaixada Timor-Leste nian iha Índia.
“Ita hasoru malu ho Ministru Asuntu External Índia nian, ita agradese tanba sira-nia apoiu ba ita másimu tebes atu estabelese ita nia Embaxada iha ne’e. Ita mós ko’alia kona-ba oinsá hametin liutan kooperasaun bilaterál entre nasaun rua ne’e,” nia dehan.
Iha ámbitu ne’e, Maukura konsege hasoru mós Prezidente Repúblika Indonézia Prabowo Subianto ne’ebé iha biban ne’e hala’o vizita Estadu ba Índia.
“Bainhira ha’u hasoru Prezidente Indonézia, ami konsege dadalia ho lian tetun tanba nia hatene ko’alia tetun uitoan,” nia hateten.
Povu komemora loron Repúblika Índia nian iha 26 janeiru 2025, no Índia iha duni komemorasaun rua dala ida de’it mak loron Independénsia iha 15 agostu no mós loron Repúblika iha 26 janeiru.
Índia komemora independénsia husi Inglaterra iha 15 agostu 1947, loron ne’ebé Parlamentu britániku aprova Lei Independénsia Índia nian 1947 ne’ebé transfere soberania lejislativa ba Asembleia Konstituinte Índia nian.
Kada 15 agostu, bandeira nasionál indianu nian hasa’e iha Forte Mean iha Nova Deli, la dook liu husi Deli Antiga no diskursu Estadu nasaun nian baibain fó husi Forte Mean nia leten. Tanba 15 agostu mak bailoron, anin manas tebes no dala barak manas tebes, to’o liu 40 Celsius.
Entretantu, Loron Repúblika ne’ebé selebra iha 26 janeiru mak atu komemora ratifikasaun konstituisaun indianu iha loron 26 fulan-janeiru tinan 1950. Entaun, maske deklara independente husi Inglaterra iha loron 15 fulan-agostu tinan 1947, iha prosesu oioin ne’ebé mak hala’o.
Iha loron 29 fulan-agostu tinan 1947, Komité Redasaun Konstitusionál harii. Hafoin diskusaun no debate barak, Konstituisaun Índia nian ikusmai adota iha 26 Novembru 1949 no tama iha vigór iha 26 Janeiru 1950.
Tuir informasaun, loron 26 janeiru hili ho intensaun simbóliku atu fó onra ba deklarasaun “Purna Swaraj” (independénsia kompletu) husi Kongresu Nasionál Índia nian iha 26 Janeiru 1930.
La hanesan ho selebrasaun sira Loron Independénsia nian, selebrasaun sira Loron Repúblika nian normalmente animadu ho parada militár ida, hahú husi foho Raisina besik Palásiu Prezidensiál (Rashtrapati Bhavan) tuir estrada luan (Rajpath), liuhusi “Odamatan Índia nian” no kontinua ba Forte Mean mós.
Hale’u parke kampu boot iha “Odamatan Índia nian” palku ida monta ba bainaka sira atu asiste parada tropa espetakulár ida-ne’e. Diferensa mak, se Loron Independénsia akontese iha bailoron, entaun Loron Repúblika iha Janeiru akontese iha invernu Nova Deli nian, ho temperatura sira menus hosi 10 C.
Jornalista : Hortencio Sanchez
Editór : Cancio Ximenes
