DILI, 30 janeiru 2025 (TATOLI)–Hospital Nacional Guido Valadares (HNGV) rejista ona pasiente hamutuk 67.050 tama iha sala Emerjénsia durante tinan 2024 nia laran.
“Pasiente sira mai ho moras oioin hamutuk 67.050, kompostu husi feto 3.532 no mane 2.018,” Xefe Departamentu Emerjénsia HNGV, Júlia Rodrigues, informa ba jornalista sira, iha resintu HNGV, kinta ne’e.
Nia dehan, pasiente sira ne’e mai ho kazu oioin, entaun Emerjénsia tau iha kategoria tolu hanesan mean, kinur no matak.
“Kategoria mean rejista 11.733, kategoria kinur 23.605 no kategoria matak 71.712. Agora kategoria mean ne’e kazu sira ne’ebé mak urjente signfika pasiente mai ita atende kedas hanesan pasiente moras fuan no dezastre ruma, ne’ebé pasiente mai la sadar. Agora kategoria kinur ida ne’e hanesan semi urjente ne’ebé bazeia ba sinál vitál sira, no ba kategoria matak ida ne’e kazu ne’ebé mai ho moras kama’an sira,” nia esplika.
Notísia relevante : HNGV kontinua hasoru problema kama iha sala emerjénsia
HNGV durante simu kazu husi munisípiu sira inklui iha Sentru Saúde sira iha Dili ne’ebé mak médiku sira referál mai iha ne’e hodi hetan intervensaun husi espesialista sira.
“Iha tinan 2024 Ospitál Nasionál mos rejista pasiente sira ne’ebé mak mate iha dalan mak mai to’o iha Emerjénsia hamutuk 162 nomós mate iha Emerjénsia bainhira ita halo ona atendimentu hamutuk 172,” Xefe Departamentu katak.
Aleinde ne’e, rejista mós asidente motór hamutuk 1.303 no kareta 123 husi ne’e pasiente mane no feto.
Jornalista : Felicidade Ximenes
Editora : Julia Chatarina
