DILI, 30 janeiru 2025 (TATOLI)—Ministru Negósiu Estranjeiru no Kooperasaun (MNEK), Bendito Freitas, kinta ne’e, hasoru malu no relata progresu servisu polítika esterna ba Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili.
“Ami mai enkontru ho ita-nia Xefe Estadu hodi informa kona-ba situasaun servisu nivel institusionál iha Ministeriu kordenasaun ba polítika esterna nian,” Ministru Bendito hateten ba jornalista sira hafoin remata reuniaun ho Xefe Estadu.
Nia dehan, durante enkontru ne’e Xefe Estadu fó mós hanoin kona-ba mudansa ne’ebé daudaun ne’e akontese iha líder polítika globál sira hanesan iha Estadu Unidu Amerika (EUA) no seluk tan.
“Prezidente fó mós nia hanoin kona-ba mudansa ne’ebé ita hasoru agora liuliu akontese iha Amérika ho nia Prezidente foun ne’ebé ho polítika foun bele ba oin, nia implikasaun mós bele to’o Timor-Leste,” nia dehan.
Aleinde ne’e, iha enkontru ne’e ko’alia mós kona-ba preprasaun Timor-Leste nian atu adere ba membru permanente ASEAN iha tinan ida-ne’e.
“Asuntu seluk ami ko’alia kona-ba ita-nia rai laran oinsá preparasaun ba ita-nia adezaun ba ASEAN importante tebes, entaun ita informa ba prezidente atu hetan apoiu ne’ebé mak nesesáriu ba konsolidasaun institusionál nomós kooperasaun interministeriál ne’ebé forte atu hala’o servisu ho másimu,” nia hateten.
Nia hatutan, kona-ba Timor-Leste nia adezaun iha tinan ida-ne’e Vise-Minisra Asuntu ASEAN Milena Rangel servisu maka’as hela ho esperansa iha tinan 2025 ne’e Timor-Leste tenke sai ona hanesan membru permanente ASEAN.
“Kona-ba ita-nia adezaun ba tinan ida-ne’e, ita-nia Vise-Ministra servisu makaas hela. Ita iha esperansa makaas tanba Prezidente ho Primeiru-Munistru hakarak ita-nia adezaun iha duni tinan ida-ne’e. Ne’ebé, ita esforsu servisu makaas hela, iha tinan ida-ne’e hakarak ka lakohi, ita tenke tama ona ba ASEAN,” nia hateten.
Jornalista : Hortencio Sanchez
Editór : Cancio Ximenes
