BOBONARU, 12 Fevereiru 2025 (TATOLI)—Diresaun Transporte Terrestre (DTT) delegasaun teritoriál Munisípiu Bobonaro, to’o ágora seidauk simu orientasaun husi Governu liuliu Ministériu Transporte no Komunikasaun (MTK) liuhusi Diresaun Nasionál Transporte no Terrestre (DNTT) atu hasai lisensa operasionál ba transporte tum-tum tula pasajeiru tanba kapasidade transporte elétriku ne’e kiik-liu.
Notísia Relevante: DNTT kria regulamentu ba tum-tum halo movimentu de’it iha Tibar
Diretór DTT Munisípiu Bobonaro, Tomás Maia, hateten durante ne’e DTT halo inspesaun ba dukumentu, transporte elétriku ne’e tama kategoría motorizada baibain ka privadu ho nia kapasidade 100 CC.
“Atividade ne’ebé tum-tum inklui motorizada Ojek hala’o iha Maliana villa ne’e ilegál, tanba sira la selu taxa ba Estadu. Sira tula pasajeiru ne’e ita konsidera hanesan negosiu, entaun tenke iha lisensa. Se laiha lisensa kualker tempu polisía bele hapara tanba viola regra infrasaun tuir regra ne’ebé iha bele selu multa ne’e husi $300 to’o $400,” Nia informa ba Jornalista sira, iha nia kna’ar fatin, kuarta ne’e.
Nia fumdamenta, motorizada elétrika ne’e iha de’it natoon maibé durante ne’e DTT munisípiu Bobonaro observa iha terrenu motorista sira tula pasajeiru liu fali kapasidade veikulu ne’e nian.
“Ha’u haree kuaze estudante sira-ne’e hadau-malu atu sa’e maibé tum-tum nia kondisaun ne’e la seguru atu tula pasajeiru, tanba anin kona ema, depois udan mós kona ema,” nia dehan.
Tum-tum ne’ebé daudaun iha ne’e, ninia estoke tuan tanba tinan kotuk Diresaun Nasionál Transporte Terrestre (DNTT) hapara ona importasaun veikulu ne’e tama iha territoriu Timor-Leste.
Motorista tum-tum, Juanino dos Santos, rekoñese seidauk hetan lisensa operasionál husi DTT Bobonaro maibé obrigatóriu hala’i buka osan tanba nesesidade mak obriga.
Durante tula pasajeiru, nia informa, kada loron nia parte bele hetan rendimientu to’o $15 no $20, maibé dalaruma parte sesaun Tranzitu Rodoviáriu, Komandu Polísia Munisípiu Bobonaro sempre halo apreensaun no aplika multa.
“Sira tilang tiha no husu SIM ka Surat Isin Mengemudi (Karta Kondusaun). Foin horisehik ho horibainrua ne’e, PNTL sira haruka ami urus Karta Kondusaun,” nia hateten.
Enkuantu, transporte ne’ebé hetan lisensa husi DTT Munisípiu Bobonaru atu halo operasaun tula pasajeiru mak hanesan Angguna, Bus no Mikrolet la inkui transporte elétriku no motorizada Ojek.
Notísia Relevante: Governu hapara provizóriu importasaun tum-tum
Jornalista : Sérgio da Cruz
Editór : Cancio Ximenes
