DILI, 12 Fevereiru 2025 (TATOLI)—Sekretariu Jerál Ministériu Negósiu Estranjeiru no Kooperasaun (MNEK), João Freitas de Câmara, informa MNEK esforsu hela hodi buka fatin oferese ba nasaun Índia no Reinu Unidu atu harii sira-nia edifísiu Embaixada iha Timor-Leste.
“Índia sira-nia reprezentasaun iha ona ne’e, sira-nia fatin iha Timor Plaza maibé ita sei buka hela fatin atu sira harii sira-nia Embaixada. Kona-ba Reinu Unidu nian, ita koordena hela atu haree edifisiu Sekretáriu Estadu Arte Kultura (SEAK) nian ne’e, maibé ita sei koordena hela ho Terra Propriedade,” João hateten ba Agência TATOLI iha Palásiu Prezidensiál Nicolau Lobato, kuarta ne’e.
Kona-ba edifisiu SEAK, nia dehan, MNEK koordena ona atu nune’e bele buka fatin seluk hodi utiliza ba edifisiu servisu.
“Ami koordena hela ho sira SEAK atu nune’e bele hamamuk fatin, nune’e ita bele fó fali ba Reinu Unidu harii fali sira-nia Embaixada. Ami mós ko’alia ona ho Terra Propriedade atu haree hamutuk, ami-nia problema boot mak agora Dili ne’e fatin kloot entaun susar loos ba ita atu buka fatin fó ba Embaixada sira harii sira-nia edifisiu,” nia hateten.
Prezidente Repúblika José Ramos Horta bainhira sei asume kargu hanesan Ministru Negósiu Estranjeiru iha primeiru Governu konstitusionál, deside ona fatin sira iha tasi ibun Faról to’o Pantai Kelapa fó ba nasaun amigu sira harii edifísiu Embaixada.
“Uluk ita-nia Prezidente Repúblika sei Ministru Negósiu Estranjeiru deside ona fatin sira tasi ibun atu fó ba ita-nia nasaun amigu sira harii Embaixada. Maibé agora ita-nia komunidade ba halo uma barak iha ne’ebá, ita atu hasai mós ulun moras uitoan. Ne’ebé, ami koordena ona ho Tera Propriedade no Ministeriu Justisa atu haree asuntu ne’e,” nia dehan.
Nasaun sira-ne’ebé estabelese ona Embaixada iha Timor-Leste
Aleinde nasaun Índia no Reinu Unidu ne’ebé atu estabelese sira-nia edifísiu Embaixada iha Timor-Leste, antes ne’e iha nasaun lubuk ida-mak estabelese ona sira-nia Embaixada iha Timor-Leste mak hanesan;
Embaixada Repúblika Filipina, lokaliza iha Rua Karketu Mota-Ain, Faról, Dili.
Embaixada Portugál, lokaliza iha Av. Presidente Nicolau Lobato, Colmera, Dili.
Embaixada Tailandia. lokaliza iha Rua de Direotor Humanos Motael, Dili.
Embaixada Estadu Unidu Amérika, lokaliza iha Avenida de Portugal, Praia dos Coqueiros, Dili.
Embaixada da República Árabe Saaraui Democrátika, lokaliza iha Faról Avenida Sergio Vieira de Melo, iha kedan edifisiu Agência Notisiosa de Timor-Lete, Institutu Públiku (TATOLI, I.P) nia kotuk.
Embaixada Santa Sé, lokaliza iha iha Rua de Direotor Humanos Motael, Dili.
Embaixada Austrália, lokaliza iha Avenida dos Mártires da Pátria, Fatuhada, Dili.
Embaixada Repúblika Federativa Brazil, lokaliza iha Rua Governador Serpa Rosa, Bairru Faról, Dili.
Embaixada Brunei Darusalám, lokaliza iha Timor Plaza Hotel & Apartments, andar lima (5)
Rua Prezidente Nicolau Lobato, Comoro, Dili.
Embaixada Repúblika Populár Xina, lokaliza iha Avenida de Portugal, Faról, Dili.
Embaixada Repúblika Kuba, lokaliza iha Rua 15 de Outubro, Kuluhun, Dili.
Delegasaun Uniaun Europeia iha Timor-Leste, lokaliza iha Palm Business & Trade Centre, 4º andar, Bloku D, Surik Mas, Fatumeta, Dili.
Embaixada Repúblika Indonézia, lokaliza iha Faról, Palapasu, Dili.
Embaixada Japaun, lokaliza iha Avenida de Portugal, Praia dos Coqueiros, Dili.
Embaixada Korea Súl, lokaliza iha Avenida de Portugal, Praia dos Coqueiros, Dili.
Embaixada Malázia, lokaliza iha Avenida de Portugal, Praia dos Coqueiros, Dili.
Embaixada Nova Zelândia, lokaliza iha Rua Jeremias, Faról, Dili.
Embaxada Ángola, lokaliza iha Avenida de Portugál, Praia dos Coqueiros, Dili.
Jornalista : Hortencio Sanchez
Editór : Cancio Ximenes
