DILI, 12 Fevereiru 2025 (TATOLI)-Governu liuhusi Ministériu Ensinu Superiór Siénsia no Kultura (MESSK) atribui subvensaun públika ba Institutu Ensinu Superiór (IES) iha territóriu ba tinan ida-ne’e sei foka de’it pontu importante tolu.
Ministru husi MESSK, José Honório da Costa Pereira Jerónimo, hatete pontu importante tolu mak, minimiza propina estudante, tulun dosente sira no fó formasaun língua.
“Governu tau matan ba UNTL ho IPB tanba instituisaun públiku, maibé kontinua fó apoiu ba universidade privadu sira”, dehan ministru iha salaun MESSK Kolmera, kuarta ne’e.
Nia dehan, universidade privadu sira iha autonomia maibé subvensaun ne’ebé Governu oferese bele loke sira-nia hanoin atu minimiza propina ba estudante inklui fasilita rekursu umanu sira iha universidade.
“Instituisaun sira ne’ebé la kumpri sira-nia relatóriu ne’ebé Governu hatete ona ne’e, ami sei halo desizaun balun”, katak nia.
Nia haktuir, tinan kotuk kada universidade hetan rihun $200 no balun rihun $300, maibé tinan ne’e kada universidade sei hetan rihun $900.
“Tinan kotuk ne’e balun hetan 200 mil no 300 mil, maibé tinan ida-ne’e ita sei fó ba buat tolu nia, entaun balun bele to’o 900 mil no balun bele to’o 1000, depende ba sira-nia ezekusaun iha tinan kotuk”, nia esplika.
Iha fatin seluk, Reitór Universidade Katólika Timorense (UCT, sigla portugés) São João Paulo II, Padre Joel Casimiro Pinto, hatete subvensaun ne’ebé Governu oferese ne’e atu tulun universidade sira maibé la’ós atu hatún propina estudante-nia.
“Oinsá mak ami universidade privadu sira minimiza propina estudante sira-nia, kuandu orsamentu ne’ebé Governu fó ne’e natón de’it. Kona-ba formasaun sira-ne’e, sim. Ita sei nafatin oferese ba ita-nia dosente sira”, nia informa.
Nia hatutan, subvensaun iha tinan kotuk UCT simu rihun $241 no ezekuta tuir relatóriu ne’ebé UCT submete.
“Tinan kotuk ne’e ami ezekuta hotu ba akizisaun dahuluk ne’e ba formasaun lingua-portugés, no mós ba dosente sira ne’ebé di’ak, no mós alunu ne’ebé meritu ba ida-ne’e, depois akizisaun ba ekipamentu laboratóriu sira, sala tele-konferénsia internasionál. Ne’ebé tinan kotuk nia ne’e ami ezekuta hotu ona”, tenik.
Notísia relevante: UNPAZ utiliza subsídiu husi Governu hodi sosa mákina ba fakuldade enjeñaria
Jornalista : Osória Marques
Editora : Rita Almeida
