DILI, 13 fevereiru 2025 (TATOLI)—Primeiru-Ministru (PM), Kay Rala Xanana Gusmão hateten, semana kotuk nia hasoru malu ho Embaixadór Fransa iha Indonézia, Timor-Leste no ASEAN, Fabian Penone, ko’alia kona-ba Fransa hakarak koopera ho Timor-Leste hodi haruka sira-nia tékniku kona-ba ‘MasterChef’ mai Timor-Leste hodi fó formasaun ba timoroan sira.
“Ha’u informa mós ba Prezidente Repúbkika katak foin lalais ha’u hasoru malu ho Embaixadór Fransa nian, sira hakarak haruka sira-nia tékniku kona-ba ‘MasterChef’ mai Timor atu bele fó formasaun ba timoroan sira kona-ba tein ninian,” Xanana hateten ba jornalista sira iha Palásiu Prezidensiál Nicolau Lobato, kinta ne’e.
Nia dehan, tékniku sira husi Fransa nian atu mai Timor-Leste hanesan oportunidade di’ak ba timoroan sira-ne’ebé estuda kona-ba turizmu nian.
“Ba timoroan sira-ne’ebé eskola hela kona-ba turizmu ida-ne’e importante tebes ba sira, atu aprende liután kona-ba oinsá mak tein hahan ne’ebé di’ak, atu atrai ema mai han. Uluk, ita adota kultura Portugál nian kona-ba tein, iha tinan 24 ita adota kultura Indonézia nian, maibé ba oin ita tenke adota hotu oinsá mak tein ne’ebé di’ak dada ema atu han, liuliu turista sira,” Xanana dehan.
Bainhira koopera ona ho Fransa kona-ba tein nian, meiu ida importante bainhira Governu kria ona turizmu komunitáriu ne’e la presiza loke otél boboot maibé prepara fatin simples no hahan mak tenke di’ak.
“Ida-ne’e oportunidade di’ak tanba ita kria yurizmu komunitáriu la presiza halo otél boboot, fatin ita halo simples, dada ema ba barak, hahan mak ita halo di’ak hodi dada ema. Sira han sente kapas, sira sei bolu malu, mai tan, mai tan. Otél boot, selu karun susar atu dada ema. Ita halo fatin simples selu ladún karun, sei dada ema mai barak, hahan mak ita prepara di’ak,” nia hateten.
Nia dehan, tékniku sira-ne’e mai bele hatudu Timor-Leste nia ai-han lokál ba sira, sira koko tein, halo modelu oinsá orsida di’ak ne’e timoroan sira haree bele halo tuir.
“Ida-ne’e di’ak tebes atu ita oferese ita-nia ai-han rasik ba turista sira-ne’ebé vizita ita-nia nasaun. Maibé, ita sei identifika munisípiu ida-idak koñesidu ho nia hahan saida, ida-ne’e mak ita haree atu oferese ba tékniku sira ne’e, atu tein hodi hanorin ita-nia ema sira. Nune’e, munisípiu ida-idak iha nia hahan rasik,” nia dehan.
Tuir Xanana, ida-ne’e parte ida husi dezenvolvimentu iha área turizmu nian no sei fó benefisiu ba nasaun.
Iha parte seluk, Embaixadór Fransa ko’alia mós ho Xanana Gusmão kona-ba kooperasaun iha área defeza no seguransa.
Fransa hakarak atu dezenvolve projetu konkretu sira-ne’ebé mak fó benefísiu ba nasaun rua, nune’e ho sorumutu ne’e sai oportunidade di’ak atu bele estabelese orientasaun foun sira hodi dezenvolve liután kooperasaun ne‘e.
Aleinde ne’e, Fransa mós interresadu atu dezenvolve kooperasaun ho universidade sira iha Timor-Leste, hodi konvida timoroan ne‘ebé hasai kursu PhD (doutoramentu) hodi vizita Fransa.
Primeiru-Ministru kontente no hakarak tebes atu estabelese no hametin liután kooperasaun iha área hirak ne’e.
Jornalista : Hortencio Sanchez
Editór : Cancio Ximenes
