DILI, 14 Fevereiru 2025 (TATOLI)—Ministériu Justisa (MJ) atribui fasilidade levantamentu kadastrál bá Diresaun Jerál Terra no Propriedade (DGTP-sigla portugés) hodi reforsa servisu levantamentu rai husi nasionál to’o munisípiu.
Ekipamentu sira ne’ebé Ministériu Justisa atribui mak hanesan komputadór desktop 50 resin, laptop 10 resin inklui ekipamentu sukat rai ne’ebé hanaran Drone 1, Leica tipu 6516 iha 2 no Leica 6508PLVS 2, kontroler 1, antena Amenal 1 no esternál 1.
Diretór Jerál Terra Propriedade, Lúcas António da Costa, relata katak akizisaun ba ekipamentu informátika no ekipamentu drone sukat rai nian ne’e maihusi orsamentu jerál Estadu 2024 ne’ebé aloka bá Diresaun Jerál Terra Propriedade iha kategoria kapitál menór ho montante $2.490.400.
“Ita sosa komputadór ne’e iha 50 resin, laptop 10 resin, mákina fotokópia ne’e iha 4 inklui ida-ne’ebé importante liu mak ita-nia ekipamentu tékniku ne’ebé hodi normaliza servisu kadastrál nian,” Lúcas hateten iha nia intervensaun iha serimónia atribuisaun ekipamentu iha salaun Ministériu Justisa, Kolmera, sesta ne’e.
Nia dehan, ekipamentu sira-ne’e atu fasilita serbisu Diresaun Jerál Terra no Propriedade husi nasionál to’o iha munisípiu sira.
Iha fatin hanesan, Vise Ministru Fortalesimentu Instituisionál, Paulo Remédios, husu ba funsionáriu sira atu utiliza ekipamentu informátika ne’e ho disipliña no labele utiliza ba asuntu privadu.
“Ha’u husu ita hotu atu utililiza ekipamentu sira-ne’e ho di’ak, utiliza ba servisu Estadu de’it,” nia afirma.
Aleinde ne’e, Ministru Justisa, Sergio da Costa Hornai sujere ba diretór no funsionáriu sira atu utiliza ekipamentu sira ne’e ho di’ak.
“Ekipamentu sira-ne’e atu tulun servisu sira Diresaun Terra no Propriedade iha nasionál no munisípiu nian. Ha’u orienta ba Diresaun Terra no Propriedade atu halo servisu hotu-hotu hodi presta servisu ne’ebé di’ak ba komunidade ,” nia tenik.
Antes ne’e, VIII Governu Konstitusionál liuhusi Ministru Justisa, Tiago Amaral Sarmento, husu ba Diresaun Servisu Munisipál Terra Propriedade nian hotu hahú halo levantamentu dadus no regulariza uma no rai Estadu ne’ebé durante ne’e utiliza husi pesoál no empreza sira.
Tiago afirma desizaun ne’e foti bazeia ba lei númeru: 1/2003 no lei 13/2013 kona-ba titularidade bens no imóveis no dekretu lei númeru: 09/ 2014 kona-ba arrendamentu ne’ebé kompleta hotu ona.
Jornalista: Natalino Costa
Editór: Xisto Freitas da Piedade
