DILI, 17 Fevereiru 2025 (TATOLI)—Ministru Negósiu Estranjeiru no Kooperasaun (MNEK), Bendito Freitas Ministru Bendito Freitas, hateten Prezidente Repúblika José Ramos Horta sei realiza eventu resesaun diplomátika ba diplomata sira iha Timor-Leste durante loron tolu (3).
Nia hatutan, tuir informasaun ne’ebé MNEK asesu husi Palásiu Prezidensiál Nicolau Lobato katak, programa ne’e sei hala’o durante loron tolu (3) ne’ebé sei hahú husi 19 Fevereiru to’o 21 fulan-Fevereiru 2025 ne’e.
“Informasaun ne’ebé ami hetan ita-nia Prezidente Repúblika mak sei organiza atividade resesaun diplomátika hodi envolve Embaixadór sira hotu iha Timor-Leste, balun rezidénsia iha ne’e no balun laiha rezidénsia iha ne’e mós sei partisipa hotu,” Ministru Bendito hateten ba jornalista sira iha edifisiu MNEK, segunda ne’e.
Durante programa resesaun ne’e, iha embaixadór lubuk ida mak sei aprezenta sira-nia kredensiál ba Prezidente Repúblika hodi hala’o misaun diplomata iha Timor-Leste.
“Iha resesaun ne’e, Embaixadór lubuk ida mak sei aprezenta sira-nia kredensiál, kuaze Embaixadór na’in 10-resin. Ida-ne’e hanesan atividade inisiu tinan 2025 nian ne’ebé Prezidente Repúblika sempre oferese resesaun diplomátika ba Embaixadór sira atu bele iha tan aproximasaun di’ak liután no fortifika ita nia relasaun billaterál entre Estadu no reprezentante Estadu sira mai iha ita-nia nasaun liuhusi sira-nia Embaixadór sira,” Bendito tenik.
Resessun diplomatika ne’ebé Xefe Estadu realiza iha tinan 2024
Antes ne’e, iha loron 21 fulan-Fevereiru 2024, Prezidente Repúblika, José Ramos Horta, organiza resesaun diplomátika anuál hodi halibur membru korpu diplomátiku, ofisiál Governu no konvidadu husi internasionál atu hametin relasaun amizade no kooperasaun entre nasaun Timor-Leste no nasaun internasionál, iha Dili.
Tuir Horta katak, resesaun ne’e fó oportunidade ida atu hasoru malu fali, hametin relasaun amizade no kooperasaun ne’ebé importante bainhira nasaun ne’e kontinua iha kreximentu.
Resesaun Anuál ne’ebé hala’o kada tinan iha Palásiu Prezidensiál hodi fó oportunidade ida ba komunidade diplomátika atu envolve diretamente ho líder timoroan sira iha situasaun sosiál ida.
Resesaun ne’e mós selebra troka kulturál liuhusi espozisaun ne’ebé hatudu Timor nia aspetu kultura, liuliu husi espozisaun etnográfika no artístika ne’ebé hatudu tradisaun antigu, kostume, ábitu sira no prátika Timor nian.
Espozisaun ne’e hakarak kadi interrese husi vizitante sira, hodi enkoraja sira atu kontinua esplora rikeza kultura Timor nian.
Jornalista : Hortencio Sanchez
Editór : Cancio Ximenes
