DILI, 19 Fevereiru 2025 (TATOLI)–Embaixadór husi nasaun hamutuk 12, kuarta ne’e, entrega karta kredensiál ba Prezidente Repúblika, José Ramos Horta, hodi hala’o misaun diplomata iha Timor-Leste, iha Palásiu Prezidensiál Nicolau Lobato, Bairru Pite, Dili.
Prezidente Repúblika, José Ramos Horta, hato’o bem-vindu tanba akreditadu mai Timor-Leste no espresa ninia kompromisu atu hametin relasaun bilaterál ho sira-nia nasaun ida-idak, tanba serimónia ne’e marka inísiu formál ba misaun diplomátika Embaixadór sira-nian ba Timor-Leste no subliña relasaun internasionál nasaun nian ne’ebé buras daudaun.
“Serimónia ohin nian, reprezenta pasu importante ida iha viajen diplomátika Timor-Leste nian. Ho espansaun ba parseria diplomátika iha kontinente tomak, ami kria oportunidade foun ba kooperasaun. Nu’udar demokrasia foinsa’e ida, ami valoriza relasaun internasionál sira-ne’e ne’ebé ajuda hametin ami-nia pozisaun iha komunidade globál enkuantu avansa ami-nia kompromisu komún ba pás no prosperidade,” Horta hateten iha nia diskursu.
Prezidente Horta hatutan, importánsia kooperasaun internasionál hodi responde ba dezafiu globál sira no avansa objetivu komún ba pás, seguransa, no dezenvolvimentu sustentável.
Embaixadór sira-ne’e hato’o saudasaun no dezeju di’ak husi sira-nia Xefe Estadu no afirma sira-nia dedikasaun atu haforte ligasaun diplomátika ho Timor-Leste.
Serimónia entrega karta kredensiál ida-ne’e reflete Timor-Leste nia esforsu sira-ne’ebé kontinua atu habelar nia ain-fatin diplomátiku no envolve ho komunidade internasionál iha rejiaun oioin.
Embaxadór hirak ne’e, daudaun ne’e rezidensia iha Indonézia, Singapura, Malázia no Austrália.
Embaixadór sira-ne’ebé aprezenta kredensiál mak hanesan:
Armin Limo, Embaixadór Estraordináriu no Plenipotensiáriu husi Bósnia-Herzegóvina, rezidente iha Jakarta, Indonézia.
Maynor Jacobo Cuyún Salguero, Embaixadór Estraordináriu no Plenipotensiáriu husi Repúblika Guatemala, rezidente iha Jakarta, Indonézia;
Jessica Maria Lópes Piña, Embaixadóra Estraordináriu no Plenipotensiáriu husi Repúblika Venezuela, rezidente iha Singapura;
Talip Küçükcan, Embaixadór Estraordináriu no Plenipotensiáriu husi Repúblika Turkia, rezidente iha Jakarta, Indonézia;
Sergei Gennadievich Tolchenov, Embaixadór Estraordináriu no Plenipotensiáriu husi Federasaun Rúsia, rezidente iha Jakarta, Indonézia;
Marc Gerritsen, Embaixadór Estraordináriu no Plenipotensiáriu husi Reinu Olanda nian, rezidente iha Jakarta, Indonézia;
Tomas Ferko, Embaixadór Estraordináriu no Plenipotensiáriu husi Repúblika Eslováka, rezidente iha Jakarta, Indonézia;
Roberto Colamine, Embaixadór Estraordináriu no Plenipotensiáriu husi Repúblika Itália, rezidente iha Jakarta, Indonézia;
Eliyahu Vered Hazan, Embaixadór Estraordináriu no Plenipotensiáriu husi Estadu Israel, rezidente iha Singapura;
Tanya Dimitrova Dimitrova, Embaixadóra Estraordináriu no Plenipotensiáriu husi Repúblika Bulgária, rezidente iha Jakarta, Indonézia;
Herman Pule Diamonds, Embaixadór Estraordináriu no Plenipotensiáriu husi Repúblika Namíbia, rezidente iha Kuala Lumpur, Malázia;
Dianela Joselina Pi Cedras, Embaixadóra Estraordináriu no Plenipotensiáriu husi Repúblika Orientál Uruguai, rezidente iha Canberra, Austrália.
Jornalista : Hortencio Sanchez
Editór : Cancio Ximenes
