DILI, 19 Fevereiru 2025 (TATOLI)—Prezidente Repúblika, José Ramos Horta, lansa inisiativa polítika foun ida-ne’ebé aborda inseguransa ai-han mundiál hodi destaka katak estimativa ema millaun 108 iha nasaun 19 mak agora daudaun moris iha inseguransa aihan aguda.
Prezidente Horta hateten, dezenvolvimentu sustentável mak krusiál, presiza asaun imediata atu ajuda sira-ne’ebé hasoru dezafiu urjente ba seguransa aihan nian.
Prezidente Horta realsa katak, evidénsia hatudu programa protesaun sosiál ne’ebé implementa ho di’ak bele transforma moris no komunidade.
“Kompromisu Timor-Leste nian liuhusi Governu nia programa tinan lima (5) ne’ebé ho objetivu atu halakon dezigualdade no mánutrisaun infantil, inklui hadi’a programa alimentasaun eskolár (merenda escolar),” Ramos Horta hateten iha nia intervensaun bainhira lansa programa ne’e iha Palásiu Nobre Lahane, ohin.
Prezidente Horta hatutan, kona-ba esforsu sira-ne’ebé la’o daudaun atu hasa’e produtividade agríkola iha Timor-Leste, inklui sistema irrigasaun foun no parseria ho nasaun sira hanesan Xina, Japaun, Indonézia no Estadu Unidu hodi introdús fini no teknolojia foun sira.
Nune’e, Xefe Estadu husu apoiu husi nasaun sira ASEAN nian, nasaun sira iha Nordeste Aziátiku, Europa no Amérika sira atu hakuak inisiativa ida-ne’e, hodi subliña katak projetu ne’e presiza kompromisu sira-ne’ebé relativamente modestu bainhira konsidera impaktu potensiál.
Ko’alia kona-ba parseria ho ajénsia sira ONU nian, partikularmente Programa Aihan Mundiál, Prezidente Ramos Horta subliña importánsia atu rezolve dezafiu sira-ne’ebé kompleksu, interligadu husi dezenvolvimentu rurál, infraestrutura no seguransa aihan.
“Polítika protesaun sosiál sira tenke konsidera vulnerabilidade individuál sira envezde aplika solusaun sira-ne’ebé hanesan ba ema hotu-hotu ba pobreza no marjinalizasaun,” nia dehan.
Jornalista : Hortencio Sanchez
Editór : Cancio Ximenes
