OEKUSI, 20 Fevereiru 2025 (TATOLI) – Jestór sub-rejiaun Nítibe Rejiaun Administrativa Espesiál Oekusi Ambeno (RAEOA), Agostinho Afulit, rekomenda ba Governu liuhusi Primeiru-Ministru, Kay Rala Xanana Gusmão atu aumenta postu Polísia Unidade Patrollamentu Fronteira (UPF) iha sub-rejiaun Nítibe.
Tanba destakamentu postu UPF iha sub-rejiaun Nítibe, iha postu rua, hanesan ida iha Usapiba’at Citrana, suku Bene-Ufe ida iha Noa-Ana suku Lela-Ufe, fatin rua ne’e mak durante ne’e iha fronteira nu’udar lutu nasaun ba povu liuliu iha postu administrativu Nítibe, tanba distánsia ho postu UPF Citrana ho Noa-Ana do’ok tebes.
Notísia relevante:Xanana husu Naktuka-oan promove dame hodi hein solusaun ba problema fronteira terestre
“Tanba ne’e, ha’u hanoin ita hotu asesu inklui Primeiru-Ministru mós haree ona fatin sira-ne’e, ami rekomenda, karik ba oin identifika to’ok fatin balun, presiza duni atu tau postu provizoriu ida ba ita-nia seguransa noaumenta tan membru UPF,” nia sujere bainhira hala’o dialogu ho Xefe Governu, kuarta foin lalais.
Iha sub-rejiaun Nítibe iha rikusoin naturál barak hanesan ai-kameli iha Citrana no rusa sira, durante ne’e menus beibeik tanba ema deskoñesidu husi rai viziñu tama mai hodi estraga.
“Maibé ami agradese tanba tinan ne’e iha rekrutamentu PNTL foun, tanba ne’e importante ba UPF atu aumenta iha fronteira, tanba durante ne’e seidauk sufisiente, la’os ejize maibé ami sujere nafatin ba tinan oin fó prioridade tanba fatin barak iha rikusoin hanesan ai-kameli iha Citrana, rusa no seluktan, dalaruma fó rizku ba ema deskoñesidu tama na’ok ita-nia rikusoin, tanba ne’e husu atu aumenta postu UPF no aumenta membru UPF,” nia hateten.
Hataan ba rekomendasaun ne’e, Primeiru-Ministru, Kay Rala Xanana Gusmão, afirma asuntu ne’e konsideradu importante, nune’e Governu sei tau ba planu.
“Iha fronteira no fatin balun, ita laiha kontrolu másimu, entaun fó espasu ba maluk sira husi sorin bele tama mai tá ai-kameli no hamate rusa sira, maibé labele hanoin katak rikusoin ai-kameli ne’e laiha valór, maibé ita sei hanoin to’o ne’e ba aumenta postu ne’e,” PM Xanana promete.
Entretanty, Tuir dadus iha sub-rejiaun Nítibe iha suku lima no aldeia 17 ho uma-kain 3.474 ho totál populasaun 18.765
Notísia relevante:UPF ho Satgas-Pamtas halo patrullamentu koordenasaun iha Naktuka
Jornalista: Abílio Elo Nini
Editór: Florencio Miranda Ximenes
