MNEK realiza semináriu kona-ba validasaun dokumentu pilár ekonómiku ASEAN
DILI, 21 Fevereiru 2025 (TATOLI)—Ministériu Negósiu Estranjeiru no Kooperasaun (MNEK) hala’o hela semináriu durante semana ida hahú loron 20-25 Fevereiru iha Salaun Institutu Estudu Diplomátiku MNEK
Semináriu ne’e ho objetivu atu valida dokumentu relasiona ho akordu komérsiu pilár ekonómiku ASEAN nian (ATIGA), Akordu Komérsiu Servisu ASEAN nian (ATISA) no Akordu Investimentu Komprensivu ASEAN nian, no inisiativa ne’e organiza husi Diresaun-Jerál ba Asuntu ASEAN husi MNEK, iha parseria ho Sentru Komérsiu Internasionál (ICT).
Reprezentante ICT, António Lobito, relata iha ámbitu projetu Uniaun Europeia Apoiu ba Integrasaun Rejionál no Komérsiu iha Timor-Leste, disponibiliza hela apoiu tékniku ba Ezekutivu ba preparasaun dokumentu ida ne’ebé bele fasilita adezaun nasaun nian ba ASEAN.
Tuir nia, dokumentu ne’e esensiál ba Timor-Leste hodi hala’o negosiasaun ho nasaun sira organizasaun nian molok adere ba akordu ekonómiku sira.
“Ohin, ami halibur reprezentante sira husi liña ministeriál oioin hodi valida oferta husi asesu ba merkadu servisu sira ASEAN nian,” António Lobito hateten ba jornalista sira iha edifisiu MNEK Dili, ohin.
Iha fatin hanesan, Diretór-Jerál interinu ba Asuntu sira ASEAN, Sidónio Martins, hateten dokumentu ne’e hafoin hetan validasaun, sei aprezenta ba Konsellu Ministru hodi halo avaliasaun molok avansa ho negosiasaun sira ho Estadu-membru sira kona-ba asesu ba merkadu rejiaun nian.
Tuir Sidónio, hafoin halo negosiasaun ho ASEAN, rezultadu sei submete ba Konsellu Ministru no tuir mai aprezenta ba Parlamentu Nasionál hodi halo retifikasaun.
“Espetativa mak, ho formalizasaun husi paktu sira-ne’e, Timor-Leste sei bele habelar nia esportasaun sira, atrai investimentu sira no hametin setór produtivu sira,” nia subliña.
Hatán kona-ba kalendáriu ba negosiasaun sira ho nasaun membru sira ASEAN nian, Sidónio Martins hateten, negosiasaun sira bele hahú de’it bainhira Konsellu Ministru avalia dokumentu ne’ebé refere.
Akordu ATIGA hakarak atu fasilita sirkulasaun livre merkadoria entre nasaun sira ASEAN nian liuhusi hamenus tarifa no barreira komérsiu nian. ATISA konsentra iha liberalizasaun setór servisu nian, hodi promove ambiente ne’ebé favoravel ba investimentu no kooperasaun entre empreza sira iha Sudeste Aziátiku.
Kona-ba ACIA, diretór ne’e esplika katak akordu ne’e buka atrai investimentu estranjeiru direta, garante enkuadramentu legál ne’ebé estável no previzível ba investidór sira.
Jornalista : Hortencio Sanchez
Editór : Cancio Ximenes
