PR Horta kondekora Embaixadora EUA ho medalla orden Timor-Leste
DILI, 21 Fevereiru 2025 (TATOLI)–Prezidente Repúblika, José Ramos Horta, kinta (20 Fevereiru 2025) ne’e, kondekora Grau Kolar Orden Timor-Leste ba Embaixadora Estraordinária no Plenipotensiária Estadu Unidu Amérika (EUA) iha Timor-Leste, Donna Ann Welton, iha Palásiu Prezidensiál Nicolau Lobato Bairru Pite, Dili.
Kondekorasaun ne’e rekoñese ninia servisu eseisionál durante iha Timor-Leste ne’ebé hametin relasaun bilaterál entre Timor-Leste no EUA, no tanba embaixadora Donna Ann reforma ona no tenke fila hikas ba Amérika iha tempu badak.
“Embaixadora Welton hatudu kompromisu ne’ebé laiha presedente atu komprende no serbí Timor-Leste, hodi sai hanesan Embaixadora Estadu Unidu dahuluk ne’ebé vizita munisípiu 13 hotu iha nasaun ne’e,” Ramos Horta hateten bainhira atribui kondekorasaun ba embaixadora ne’e.
Horta dehan, abordajen ba diplomasia inklui halo kontaktu ho sidadaun sira iha nivel hotu sosiedade nian, husi ofisiál sira aas ba labarik eskola sira iha área rurál no partisipa ativamente iha inisiativa kulturál, seguransa no dezenvolvimentu ekonómiku.
Realizasaun importante durante mandatu Embaixadora Welton nian inklui fasilita kooperasaun defeza krusiál entre Timor-Leste no Guarda Nasionál Rhode Island, estabelese programa Inkubadór Negósiu hodi promove kresimentu ekonómiku no apoiu projetu prezervasaun kulturál liuhusi programa bolsa Estadu Unidu nian.
“Nu’udar rekoñesimentu ba kontribuisaun estraordinária Embaixadora Donna Ann Welton nian hodi hametin ligasaun entre Estadu Unidu Amérika no Timor-Leste, no ninia servisu dedikadu ne’ebé benefisia sidadaun timoroan barak iha tinan hirak nia laran, ho onra boot ha’u kondekora ba nia Grau Colar Orden Timor-Leste nian,” Horta tenik.
Horta hatutan, embaixadora Welton nia esforsu hodi promove amizade entre povu Timor-Leste sai fundamentál ba pás, estabilidade nasionál no dezenvolvimentu Timor-Leste nian.
Kondekorasaun ida-ne’e reprezenta apresiasaun aas liu husi Timor-Leste ba ninia servisu no kompromisu estraordinária hodi promove parseria forte entre nasaun rua.
Embaixadora Welton nia rekoñesimentu reflete parseria ne’ebé dura entre Timor-Leste no Estadu Unidu, ne’ebé kontinua buras liután liuhusi kompromisu hamutuk ba demokrasia, dezenvolvimentu ekonómiku no seguransa rejionál.
Nasaun rua ne’e nafatin dedikadu hodi avansa interrese komún hirak ne’e no hakbiit amizade ne’ebé kle’an entre povu Amerikanu ho timoroan sira.
Jornalista : Hortencio Sanchez
Editór v : Cancio Ximenes
