DILI, 22 Fevereiru 2025 (TATOLI)—Komunidade Batak-Indonézia iha Timor-Leste, sabádu ne’e, komemora festa ida hanaran “Pesta Partangiangan Bona Taon Batik di’ak loos” Timor-Leste ka komemora tinan foun, iha salaun Katedrál Dili.
“Ita husu ba Maromak fó saúde di’ak no tempu halibur malu hamutuk iha komemorasaun ne’e. Tinan foun nu’udar momentu importante ba komunidade Batak iha Timor-Leste, la’ós atu selebra de’it tinan foun, maibé atu agradese relasaun família no proteje kultura ida-ne’e mak kultura Batak,” Primeiru Ministru (PM), Kay Rala Xanana Gusmão, bainhira partisipa iha komemorasaun loron ne’e hamutuk ho komunidade Batak -Indonézia, iha salaun Katedrál, Dili.
Nia hateten, atividade ne’e di’ak tebes hodi hamutuk ho timoroan sira, saida mak TL bele aprende husi ne’e mak amizade, solidariedade no bele serbisu makas ba aan rasik, família, komunidade no mós ba nasaun ne’e.
“Ho ida-ne’e apresia tebes ba patrosinadór sira hotu nia apoiu realiza eventu ne’e di’ak tebes bele hasoru malu hamutuk, sai família, solidariedade entre sidadaun,’’ nia dehan.
Xanana husu komunidade Batak iha Timor-Leste bele kontribui ba dezenvolvimentu Timor-Leste, no husu husu eventu sira-ne’e iha futuru atu realiza partisipa barak liután husi sidadaun timoroan sira hametin liután amizade entre sidadaun rai rua.
Embaxadór Indonézia iha Timor-Leste, Okto Dorinus Manik, hato’o agradesimentu ba Xefe Governu no Dom Virgilio Kardeál nia prezensa hodi hamutuk ho komunidade Batak-Indonézia iha Timor-Leste komemora tinan foun.
Responsável komisaun organizadora, Ando Harahap, dehan tuir kultura Batak ohin sidadaun Batak iha Timor-Leste komemora tinan foun.
Jornalista : Nelson de Sousa
Editór : Cancio Ximenes
