VIKEKE, 24 Fevereiru 2025 (TATOLI)—Xefe suku Uaimori, postu Vikeke Vila, munisípiu Vikeke, Francelino Antonio Gomes, hateten dadaun ne’e kondisaun estrada liga ba suku Uaimori nia kondisaun aat, nune’e difikulta komunidade asesu fasilidade saúde liuliu transporta moras grave ba sentru saúde.
“Kondisaun dalan ne’ebé liga ba ami-nia suku Uaimori daudaun ne’e kondisaun aat grave liu, hodi difikulta transporte públiku movimentu ba-mai, komunidade labele lori sai sira-nia produtu loká bá merkadu no difukulta komunidade asesu fasilidade saúde,” Autoridade Uaimori ne’e hateten ba jornalista sira iba resintu Administrasaun Munisipál Vikeke, ohin.
Autoridade ne’e hateten, foin lalais iha sesta (21/02) ne’e katuas ida moras iha suku Uaimori no sira kontaktu ba ambulánsia hodi transporta mai hospitál internamentu, maibé kondisaun dalan aat entaun ambulánsia mós labele asesu.
“Nune’e, família sira hulan moras ne’e husi suku Uaimori to’o iha área Osouake kuaze kilómetru hitu (7) hafoin ambulánsia tula moras ne’e tula bá hospitál Internamentu Vikeke Vile. Dalan ne’e sai difikuldade tebes ba ami, ami kuandu ba Uaimori tenke liuhusi área Venilale mak foin to’o Uaimori,” nia hateten.
Kona-ba preokupasaun Estrada aat ne’e, nia parte aprezenta beibeik ba autoridade munisípiu Vikeke no ministériu relevante maibé to’o agora seidauk iha resposta ruma.
“Kona-ba preokupasaun ne’e ha’u hato’o beibeik ona ba autoridade no servisu obra públika Vikeke nian, maibé sira dehan nasionál mak hatene no iha nasionál mak iha orsamentu hodi hadi’a dalan sira-ne’e. Ho ida-ne’e, ha’u husu Governu liuhusi Ministériu Obra Públika tau matan ba ami-nia estrada, atu nune’e povu bele asesu,” nia dehan.
Iha fatin seluk, xefe sentru saúde Vikeke Vila, João Cortereal, hateten dalan liga ba suku Uaimori tempu udan kondisaun estrda aat, nune’e difikulta ba pesoál saúde no mós karreta ambulánsia atu ba fatin refere.
“Kazu emerjénsia ruma iha suku Uaimori, difisil ba ita ba tula lalais tanba kondisaun dalan aat hodi difikulta ba ita-nia servisu saúde. Ita husu parte Governu tau atensaun ba dalan sira-ne’e atu ita atende ba ita-nia komunidade moras karik fasil no atendementu lalais,” nia hateten.
Tuir dadus, populasaun suku Uaimori iha aldeia neen (6) mak hanesan Uma Liurai, Uma Boo, Uaibubu, Lu-Lei, Uatu-Lesu no Mea-Uain, ho totál populasaun hamutuk 1.142, kompostu husi feto na’in-564 no mane na’in-578 husi totál uma kain hamutuk 242.
Jornalista : Vitorino Lopes da Costa
Editór : Cancio Ximenes
