OEKUSI, 25 Fevereiru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diretór Planeamentu Administrasaun Finansa hamutuk ho Diresaun Rejionál Infraestrutura (DRI), halo inaugurasaun ba projetu reabilitasaun edifísiu patrimóniu Estadu, ne’ebé lokaliza iha bairru Masin, suku Costa, sub-rejiaun Pante Makasar.
Biban ne’e, Diretór Planeamente Administrasaun no Finansa iha Sekretária Rejionál Finansa, Domingos Maniquin agradese ba kompañia tanba ezekuta projetu ne’e ho responsabilidade, maske durasaun servisu fulan-tolu de’it maibé garante to’o finaliza ho di’ak.
Notísia relevante:Funsionáriu iha papél proteje patrimóniu Estadu hodi servi povu
“Ohin, ita simu ona fasilidade ne’e husi kompañia ita haree edifísiu foun no di’ak tebes, tan ne’e ita espera, funsionáriu sira iha patrimóniu Estadu bele aproveita didi’ak, nune’e servisu bele la’o no hatudu prestasaun di’ak iha patrimóniu ida-ne’e,” dehan nia iha ámbitu inaugurasaun ne’e.
Iha fatin hanesan, Diretór Diresaun Rejionál Infraestrutura, Remigío Nuno Sila, informa edifisíu ne’e hahú ezekuta durante fulan haat, iha loron 30 Outubru 2024 no konklui iha loron 30 Janeiru 2025, nune’e inspesaun finál husi obra públika hala’o mak iha loron 02 Fevereiru foin lalais ne’e.
“Iha rezultadu fiskalizasaun ne’e hatudu kompañia progresu di’ak tanba kualidade ne’ebé ita agradese ba kompañia hamutuk ho nia tékniku no traballadór sira bele finaliza projetu ne’e tuir tempu no time-line ho nia jestaun ne’ebé mak di’ak, bele kumpre BoQ no dezeñu sira ne’ebé iha ona,” nia orgullu.
Entretantu, Diretór Patrimóniu Estadu Oekusi, Gonzalo dos Remedios Eko, hato’o agradese ba Governu tanba iha tinan rua kotuk bele integra iha Planu Asaun Annuál (PAA) 2024 hodi halo reabilitasaun.
“Ha’u agradese tanba edifisíu patrimóniu Estadu ne’e harii iha tinan 2012, agradese tanba durante ne’e ami mak uza ladun favoravél, entaun iha 2023, ami hatama tau ba iha planu orsamenta atu hadi’a netik tanba ita servisu ladun seguru plafon sira mós monu hotu no sementu mós nakfera, tan ne’e ita hadi’a iha 2024,” nia afirma.
Entretantu, projetu reabilitasaun ne’e ezekuta husi kompañia Juta Banliun Unipesoál Lda, ho valór kontratu $39,219.60, orsamentu ne’e Autoridade RAEOA aloka husi Orsamentu Jerál Estadu (OJE) 2024 nian ho durasaun servisu fulan tolu.
Notísia relevante:MF introdús matéria haat iha Oé-Cusse bá polítika jestaun patrimóniu Estadu
Jornalista: Abílio Elo Nini
Editór: Florencio Miranda Ximenes
