BOBONARU, 04 Marsu 2025 (TATOLI)-Komunidade preokupa ho implementasaun Projetu Eletrifikasaun Komunitária (PEK) ba aldeia tolu iha suku Ritabou, postu administrativu Maliana, munisípiu Bobonaru hanesan Daitete, Mahui no Riti-Udu, tanba projetu finaliza ona maibé instalasaun seidauk kobre uma-kain kuaze 90.
Notísia Relevante: Tempu-badak, aldeia tolu iha Ritabou asesu ona enerjia elétrika
“Ninia prosesu instalsaun liña boot ne’e ita bele hatete 100% ona, soké atu halo kondisaun ba uma-uma ne’e mak ha’u bele dehan foin mak 50%, tanba uma-kain balun por-volta 90 mak seidauk halo instalasaun, ida-ne’e mak ami preokupa,” Xefe aldeia Mahui, Romeo Mau, informa ba jornalista sira iha sede suku Ritabou, tersa ne’e.
Sorin seluk, Supervizór EDTL, E.P munisípiu Bobonaru, Mario de Jesús, rekoñese seidauk halo instaalsaun ba uma kain hirak ne’e ho razaun tanba materiál iha Armajen Nasionál laiha, maibé esforsu finaliza obra ne’e hodi fó naroman ba komunidade sira.
“Semana kotuk mak materiál foin tama. Ne’ebé, iha tempu badak ami sei finaliza ba komunidade nia uma. Maibé, lina media no baixa tensaun 100% ona, ahí lakan hela, soké sira nia kabu Baixada mak seidauk halo koneksaun ba liña foun. Ne’ebé, ami semana oin sei tun ba Dili halo rekizasaun para ita bele konklui ona,” nia dehan.
Enkuantu Projetu Eletrifikasaun Komunitária (PEK) ne’e finaliza, sei fornese enerjía elétrika ba uma kain 1000-resin.
Notísia Relévante: Aldeia tolu iha Ritabou kada família kontribui $100 dada rasik liña elétrika
Jornalista : Sérgio da Cruz
Editór : Cancio Ximenes
