DILI, 06 Marsu 2025 (TATOLI)–Primeiru-Ministru, Kay Rala Xanana Gusmão, hateten iha tempu badak Primeiru-Ministru Vietname, Pham Minh Chinh, sei vizita Timor-Leste hodi hametin kooperasaun bilaterál.
“Foin lalais Prezidente Repúblika vizita ba iha Vietname, entaun ohin ami na’in-rua (2) diskute uitoan kona-ba preparasaun ita-nian atu simu vizita ida husi Primeiru-Ministru Vietname atu mai ne’e, ita sei haree kooperasaun saida mak ita sei halo iha área oioin ne’ebé ita presiza,” Primeiru-Ministru, Kay Rala Xanana Gusmão, hateten ba jornalista sira iha Palásiu Prezidensiál Nicolau Lobato Bairru Pite, kinta ne’e.
Nia dehan, kooperasaun ne’ebé Timor-Leste halo ho Vietname daudaun ne’e iha área telkomunikasaun tanba empreza Telemor agora investe hela iha Timor-Leste.
“Vietname ajuda ita tebes iha 2009 tanba iha krize mundiál kona-ba ai-haan. Iha ita-nia nasaun mós araska tebes, ha’u rasik ba to’o Vietname ko’alia, nune’e mak ita sosa tiha foos husi sira faan fali ba ita-nia povu ho presu kiik hodi rezolve araska ai-han iha tempu ne’ebá,” Xanana hateten.
Tanba ne’e, nia hateten, Vietname hanesan nasaun ida-ne’ebé relasaun di’ak tebes ho Timor-Leste.
Kooperasaun TL-Vietname
Governu Timor-Leste iha tinan 2010, liuhusi Ministériu Turizmu, Komérsiu no Indústria (MTKI) iha kooperasaun di’ak iha área komérsiu no indústria ho Repúblika Sosialista Vietname.
Ho relasaun di’ak ne’ebé iha, delegasaun kompostu husi ema hamutuk 11 reprezenta Governu Vietnam ho setór privadu hala’o vizita mai Timor-Leste, Kuarta (03/11/2010), hodi hasoru malu no ko’alia kona-ba futuru komérsiu no indústria nasaun rua nian ho Ministru Turizmu, Komérsiu no Indústria, Gil da Costa Alves, no Autoridade Kámara Komérsiu Indústria Timor-Leste (KKI-TL).
Iha entrevista ho jornalizta sira iha salaun konferénsia antigun Merkadu Lama, Dili, Kinta (04/11/2010), Xefe delegasaun husi Vietnam3, Dao Ngoc Chuong, hateten sira prontu atu apoia Timor-Leste iha área komérsiu no indústria no kontente tebes tanba odamatan Timor-Leste nakloke ba sira atu mai hala’o investimentu.
Diretór Jerál Azia Pasifik, Departamentu Merkadu ne’e hateten, sira husi Vietname hakarak hala’o investimentu iha Timor-Leste liuliu iha área agrikultura, rekursu naturál no área komérsiu no indústria seluk.
Delegasaun hasoru malu ho reprezentante CCI-TL hodi ko’alia ho setór privadu sira atu oinsá bele iha envolvimentu di’ak iha dezenvolvimentu komérsiu no indústria Timor-Leste no Repúblika Sosialista Vietname.
Entretantu, Diretór Nasionál Komérsiu Esternu (DNCE), Hélio Sinatra Tavares, iha nia intervensaun ba jornalista sira esklarese katak nia parte iha kompromisu boot hametin kooperasaun di’ak ho Vietname iha área komérsiu no indústria.
Hélio Sinatra Tavares informa, vizita delegasaun husi Vietname iha Timor-Leste mós ko’alia kona-ba akordu ne’ebé Timor-Leste hala’o ho Vietname iha área komérsiu, liuliu oinsá mak nasaun rua ne’e bele sosa no faan sasán ka produtu ba malu atu nune’e bele hasa’e ekonomia nasaun rua nian.
Vietname hanesan nasaun ida-ne’ebé ninia ekonomia haksoit sa’e lalais de’it hafoin funu. Vietname mós koñesidu hanesan nasaun ne’ebé produsaun fós barak liu iha mundu no nasaun barak mak ba sosa fós iha nasaun ne’e inklui Timor-Leste.
Jornalista : Hortencio Sanchez
Editór : Cancio Ximenes
