PR Horta parabeniza feto no labarik feto iha Timor-Leste
DILI, 07 Marsu 2025 (TATOLI)—Prezidente Repúblika, José Ramos Horta, parabeniza feto no labarik-feto hotu iha Timor-Leste no mundu tomak ne’ebé selebra loron internasionál feto iha 08 Marsu kada tinan.
“Iha loron Internasionál Feto, ha’u hato’o ha’u-nia parabéns ba feto no labarik-feto hotu iha Timor-Leste no iha mundu tomak, bainhira ita hamutuk ho tema internasionál “Ba Feto no Labarik-Feto Hotu, Direitu sira, Igualdade, Empoderamentu” no ita-nia tema nasionál, “Feto Bele Lidera iha Área Hotu,” PR Horta hateten liuhusi nota ne’ebé Agência TATOLI asesu, sesta ne’e.
Xefe Estadu ne’e hateten, istória Timor-Leste nian labele haketak husi forsa no rezisténsia husi feto sira, husi luta ba independénsia to’o harii nasaun, feto Timor-Leste hatudu ona lideransa esepsionál, korajen no determinasaun.
“Sira sai ona funu-na’in, ema ne’ebé halo dame, emprezáriu, edukadór, fornesedór kuidadu saúde, no guarda ba ita-nia patrimóniu kulturál,” PR Horta hateten.
Prezidente Horta hatutan, tema nasionál ba tinan ida-ne’e hodi komemora loron mundiál feto importante tebes no dezafia ema hotu atu rekoñese no valoriza feto sira-nia servisu.
“Ita-nia tema nasionál tinan ida-ne’e, “Feto Bele Lidera iha Área Hotu,” la’ós de’it aspirasaun maibé apelu ba asaun. Ida-ne’e dezafia ita atu rekoñese no apoia feto sira-nia potensiál lideransa iha área hotu, husi Governu no negósiu to’o agrikultura no akademia. Ida-ne’e fó hanoin mai ita katak bainhira feto lidera, ita-nia nasaun tomak hetan benefísiu husi sira-nia perspetiva úniku, ideia inovativu no abordajen kolaborativu sira,” nia dehan.
Tuir Horta, dalan ba igualdade loloos presiza envolvimentu husi sosiedade tomak.
“Ha’u husu ba mane no labarik-mane sira atu sai aliadu ativu iha jornada ida-ne’e, dezafia estereótipu sira-ne’ebé prejudika no apoia feto sira-nia lideransa iha iha sira-nia família, servisu-fatin no komunidade,” Horta hateten.
Lideransa lahatene jéneru no progresu presiza partisipasaun tomak husi ema hotu, bainhira empodera feto sira atu lidera.
“Iha Loron Internasionál Feto, mai ita renova ita-nia kompromisu atu harii futuru ida hamutuk no kria nasaun ida-ne’ebé justu, pasífiku no prósperu liu ba ema hotu,” nia dehan.
TATOLI
