OEKUSI, 10 Marsu 2025 (TATOLI) – Iha loron domingu, 09 Marsu ne’e, tuku 16:00 otl, akontese inséndiu tanba kauza husi sirkuitu eletrisidade hodi rezulta ahi-han motuk uma komunidade ida iha iha bairru Masin, aldeia Sanane, suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Husi dezastre ne’e rezulta kondisaun uma komunidade ne’e tama iha kategória aat totál, nune’e família vítima sei hetan rekuperasaun materiál konstrusaun husi Governu.
Notísia relevante:Inséndiu iha Usitasa’e, Palmira Mala lakon osan $6.400
“Inséndiu ne’e akontese iha oras 16:00, kauza husi sirkuitu eletrisidade tanba uma- na’in rasik laiha no hela de’it oan sira mak toba hela iha uma laran. Nune’e bazeia matadalan APC ne’ebé identifika katak uma referidu tama iha kategória aat totál, entaun ita sei prosesa hodi submete ba nasionál atu hetan rekupasaun hanesan materiál konstrusaun sivíl, tanba uma ne’e motuk. Ohin ami halo oan asaun emerjénsia liuliu hahan no sasan balun atu sustenta família sira husi dezastre ne’e,” Komandante Operasaun Autoridade Protesaun Sivíl, João Sila, hateten ba jornalista iha Oekusi, ohin.
Autoridade Protesaun Sivíl ne’e esplika prosesu atu hetan materiál konstrusaun sivíl sira-ne’e, sei kle’ur tanba dadus inséndiu iha tinan 2024 mak foin prosesa iha tinan 2025 ne’e, nune’e Governu sei entrega materiál rekuperasaun sira-ne’e ba vítima iha fali tinan 2026.
Iha fatin hanesan, Vicente Landos nu’udar uma-na’in konta katak inséndiu ne’e akontese tana sirkuitu eletrisidade, nune’e ahi lakan kedan husi uma-laran.
“Horisehik akontese iha lorokraik, ha’u mós lahatene tanba ha’u toba dukur iha uma-laran, ha’u sente manas ona mak foin hakfodak, hader mai ahi-suar maka’as ona iha uma-laran, ha’u deskonfia sirkuitu eletrisidade ka MCB mak aat, tanba ami mós la sunu ahi no lilin iha uma laran,” nia konta.
Hafoin akontese dezastre naturál ne’e, nia kota sasán barak la konsege salva hanesan mak sertifikadu títulu rai, dokumentu hanesan diploma, sertidaun baptizmu no RDTL, billete identidade, eleitorál, osan balun, televisaun, ropa,hahán sira inklui animál manu no asu.
“Tan ne’e, ami espera Governu bele ajuda netik ami tanba ami-nia sasán iha uma laran motuk hotu,” nia husu ho triste.
Entretantu, APC apoia ona nesesidade bázika hanesan hahan no la’ós hahan hanesan foos, supermie, mina-goreng no ai-han seluk tan inklui bikan, kanuru, lona no sasán dapur nian.
Notísia relevante:Fulan ne’e, APC Oé-Cusse rejista dezastre naturál 30
Jornalista: Abílio Elo Nini
Editór: Florencio Miranda Ximenes
