Asosiasaun Juventude Inovativa simu apoiu husi Japaun reabilita EBF Lour Bobonaru

DILI, 18 Marsu 2025 (TATOLI)—Asosiasaun Juventude Inovativa simu apoiu fundu ho montante $143.000 husi Grant Assistence for Grassrots Human Security Project (Subvensaun Asisténsia ba Projetu Seguransa Umanu iha Baze) liuhusi embaixadór Japaun iha Timor-Leste hodi reabilita eskola Ensinu Báziku Filial (EBF) Lour, iha munisípiu Bobonaru.

Prezidente Munisípiu Bobonaru, Filipe de Jesus, rekoñese eskola barak iha munisípiu Bobonaru presiza atensaun, maibé EBF Lour iha problema hanesan falta saladeaula, kondisaun eskola ne’ebé risku ba profesór no estudante sira no vulnerável tebes bainhira tempu udan.

“Ami sei harii saladeaula tolu, sala profesór ida no kazadebañu tolu ne’ebé sei fahe espesifikamente ba profesór, alunu no estudante feto”, Filipe de Jesus hatete iha Embaixada Japaun, tersa ne’e.

Nia esplika EBF Lour lokaliza iha aldeia Tas Golo, Suku Lour, ne’ebé área rurál ida iha munisípiu Bobonaru.

Embaixadór Tetsuya Kimura hatete, edukasaun nu’udar prioridade ida iha Timor-Leste nia dezenvolvimentu, nune’e Japaun realiza importánsia ida-ne’e atu fornese edukasaun ho kualidade ba ema hotu, inklui iha área rurál sira.

“Ha’u hein katak ema hotu ne’ebé envolve iha konstrusaun sei kontinua serbisu maka’as hodi kompleta ba susesu projetu ida-ne’e. Ha’u hein atu hasoru fali imi hotu no komunidade iha fatin projetu nian iha serimónia entrega”, nia hatete.

Nia subliña, governu Japaun implementa ona ho ativa projetu oioin iha Timor-Leste, hahú hosi dezenvolvimentu infraestrutura ho eskala boot to’o projetu ho eskala kiik ne’ebé fó benefísiu diretamente ba komunidade lokál.

Diretór Jerál Ensinu Pre-Eskolár, Ensinu Báziku no Ensinu Rekorrente, Apolinario Serpa Rosa, hateten Ministériu Edukasaun iha prioridade barak, no orsamentu presiza fahe ba nesesidade oioin, tanba ne’e inisiativa husi Asosiasaun Juventude Inovativu ho apoiu husi Governu Japaun ne’e di’ak tebes ba setór edukasaun.

“Ami agradese tebes ba Asosiasaun Juventude Inovativu iha Bobonaru. Ha’u elojia joven sira ne’ebé lidera organizasaun ne’e, tanba hatudu espíritu patriótiku loloos. Ita-boot sira haree problema sira ne’ebé sosiedade hasoru no hetan solusaun sira, nune’e fó ezemplu estraordináriu ida kona-ba oinsá joven sira bele halo diferensa no iha papél importante iha dezenvolvimentu ita nia nasaun nian”, nia hatete.

Tuir nia, parseria ne’ebé sólidu entre Governu, Sosiedade Sivíl ne’ebé sai hanesan xave ba nasaun nia susesu no iha parseria ho Japaun, Timor-Leste sei dezenvolve nafatin atu nune’e sidadaun ida-idak bele moris no aprende ho dignu.

Notísia relevante: Japaun iha kompromisu kontinua apoia dezenvolve Timor-Leste

Jornalista       : Osória Marques

Editora           : Rita Almeida