DILI, 18 Marsu 2025 (TATOLI)–Embaixadór no Reprezentante Permanente Timor-Leste ba Organizasaun Nasaun Unida (ONU) iha Nova Iorke, Dionísio Babo Soares, hateten iha sábadu (15 Marsu 2025) ne’e, Reuters no mídia doméstiku oioin husi Estadu Unidu fó sai katak to’o nasaun 43 mak inklui iha administrasaun Trump nia proposta bandu viajen foun, maibé ida-ne’e seidauk iha lista ofisiál ne’ebé fó sai husi Estadu Unidu Amérika (EUA).
“To’o agora, seidauk iha lista ofisiál ne’ebé mak fó sai hosi Governu Estadu Unidu Amérika. Tanba ne’e, ita tenke hein lista finál atu hetan aprovasaun husi White House,” Dionisio Babo hateten ba Agência Tatoli, segunda ne’e.
Tuir memorandu internu ne’ebé mídia sira-ne’e simu, Reuters informa katak haree memo ida-ne’ebé lista nasaun 41, inklui Timor-Leste, enkuantu The New York Times fó sai lista nasaun 43 ne’ebé Timor-Leste la inklui.
Lista eszosu rua ne’ebé diferensa ne’e hamosu diskusaun luan entre komunidade timoroan sira, hodi kestiona karik Timor-Leste inklui duni ka esklui uosi bandu viajen foun Trump nian.
Komenta kona-ba ne’e, Reprezentante Permanente Timor-Leste ba Nasaun Unida, Dionísio da Costa Babo Soares, hateten di’ak-liu hein lista finál hodi konfirma karik Timor-Leste tama iha restrisaun viajen ka lae.
Ofisiál norte-amerikanu ida-ne’ebé la fó sai nia naran hateten katak bele iha mudansa sira ba lista ezbosu ne’ebé dezenvolve ona husi Departamentu Estadu nian iha semana balun liubá, tanba seidauk hetan aprovasaun husi Administrasaun Trump.
Relatóriu sira afirma katak proposta foun bandu viajen nian husi administrasaun Trump nian ho objetivu atu rezolve ameasa seguransa nasionál no seguransa públika nian.
Hanoin hikas katak, iha 20 Janeiru 2025, administrasaun Trump nian fó sai orden ezekutivu ida hodi intensifika verifikasaun seguransa nian ba sidadaun estranjeiru ruma ne’ebé tenta atu tama iha EUA.
Jornalista : Hortencio Sanchez
Editór : Cancio Ximenes
